Pasangil gipanghimakak sa mga opisyal sa Medellin.

CEBU, Philippines - Kusganong gipanghimakak sa mga opisyal sa lungsod sa Medellin ang  pasangil  nga gisagolan og  pamolitika ang  pagpang-apod-apod nila og  hinabang ngadto sa ilang mga konstituwente sa ilang lungsod.

Sumala pa ni Vice Mayor Alfonso Lim nga walay kamatuoran ang pasangil sa iyang mga kaatbang sa politika sanglit pipila na ka semana ang ilang gihimong pagpanghatag sa maong hinabang sama sa mga kinilong bugas, sardinas, mga noodles ug uban pa,  nga  walay  pamolitika.

Iyang gitataw nga ang maong kalihukan dili  kay  sa ila  rang  lungsod  gihimo  kundi   bisan sa  ubang  lungsod  sa  ika-upat nga  distrito  gihimo  usab  kini  uban sa abag nila ni 4th district Cong. Benhur Salimbangon ug sa kaalyado niini sa Partido sa One Cebu.

Iya usab nga gitumbok nga ang pagpanghatag sa maong hinabang sa katawhan sa lungsod sa Medellin nahimo na kini nilang obligasyon tungod kay matag tuig ila man kining  gihimo ug sukwahi kini sa gipasangil sa kaatbang nga gihimo kini nila tungod kay hapit na ang piniliay.

Gani iyang gitumbok nga ang paghatag sa maong hinabang gipaagi sa DSWD sa ilang lungsod ug sa mga kabarangayan agi og pagmatuod nga sayop ang gipasangil sa ilang kontra sa politika. (BANAT NEWS)