Usher sa masiao nasikop sa akto

CEBU, Philippines - Nadakpan sa akto sa kapolisan ang usa ka tawo nga nagpasiugda og  suwertres  nga masiao sa sitio Aroma sa barangay Subangdaku, dakbayan sa Mandaue   sa miaging buntag.

Si PO2 Modesto Lutchavez sa kapolisan sa Presinto 1 sa Mandaue City Police Office (MCPO) miila sa  nadakpan nga mao si Joselito Catalan, 45 anyos, minyo nga taga sitio Alaska sa barangay Mambaling, dakbayan sa Sugbo.

Matud pa ni PO2 Lutchavez nga nasigpatan sa team sa kapolisan  ang maong suspetsado nga busy kaayo sa pagpangisyu og numero sa illegal nga sugal nga gitawag  nga suwertres nga masiao ngadto sa pipila ka mga customer.

Ang  mga  sugarol  nga  tigpamalit  og  tiket  sa masiao  mialibwag og  dagan  dihang  namatikdan  nila  ang  pag-abot  sa mga  polis.

Wala  makaikyas  ang  suspetsado  busa  dali kaayo  kining  nasikop sa kapolisan .

Matud pa ni PO2 Lutchavez nga naglakip sa mga ebidensiya nga ilang nasakmit mao ang 17 ka mga stab sa suwertres nga pulos  adunay mga gisuwat nga number combination nga naglakip sa doble ug triple nga combination sa numero.

Ang suspetsado nga nagtingkagol karon sa sulod sa selda sa bilanggoan ug kasamtangang  ilang giandam ang kaso nga ilang ipasaka nga may labot sa kalapasan sa Republic Act 9287 kon anti illegal numbers game nga hugtanon karon nga gipatuman sa kagamhanan. (BANAT NEWS)