Rama nangumusta sa iyang reklamo batok ni Osmeña diha sa Ombudsman

CEBU, Philippines - Gipadad-an og suwat ni Mayor Michael Rama si Ombudsman Conchita Carpio-Morales ug nagpakisayod siya bahin sa kaso nga iyang gipasaka batok ni Kongresista Tomas Osmeña.

Ang kaso nga gipasabot ni Rama mao ang kabahin sa pagamit sa Dodge Charger nga sakyanan nga matud sa mayor gidonar kaniadto sa Bigfoot ngadto sa dakbayan apan gidala ni Osmeña dihang dili na siya mayor.

Si Rama nakapadala na og suwat ngadto kang Ombudsman Morales pinitsahan og Enero 22 ug gidawat sa Ombudsman-Visayas pagka Enero 31, nga nagpakisayud sa kalamboan sa kaso.

Gimandoan ni Rama si City Administrator Jose Marie Poblete nga himoan og laing suwat-follow-up si Ombudsman Morales aron sila masayud kun unsa na ang gihimo sa Ombudsman sa maong kaso. Nangangkon si Rama nga ang duha ka Dodge Charger nga US-made vehicles gisakay-sakayan na kaniadto sa mga police back-up ni Osmeña atol nga siya pa ang mayor apan wala na kini niya igkita atol nga siya na ang milingkod nga mayor sa dakbayan.

Si Osmeña wala molimod nga anaa kaniya ang duha ka sakyanan nga matud niya gipalit na ni Minnie Osmeña tungod kay wala ipadayon og donar ngadto sa dakbayan ni Michael Gleissner nga tag-iya sa Bigfoot Entertainment ang maong mga sakyanan.

Matud ni Osmeña nga dili makabuot si Rama kun ang tag-iya sa sakyanan dili mopadayon sa pagdonar niini ngadto sa dakbayan ubos sa administrasyon ni Rama.

Si Osmeña nagkanayon nga pagkasayod ni Gleissner nga kutob na lang sa Hunyo 30, 2010 ang iyang termino mihukom kini nga inay ihatag ang sakyanan sa dakbayan ihatag na lang niya kini ngadto kang Osmeña. Apan gibalibaran kini ni Osmeña ug iyang gisugyot nga si Minnie na lang maoy mopalit sa mga sakyanan.  (BANAT NEWS)