CEBU, Philippines - Sulod sa duha ka oras, duha ang patay ug laing tulo ang angol sa managlahing disgrasya sa kadalanan sa lungsod sa Sibonga ug San Fernando sa miaging adlaw.
Usa ka giingong may kakulian sa pangisip ang patay human maligsi sa usa ka motorsiklo sa national road sa Sitio Taloot, Barangay Poblacion, Sibonga mga 10:30 sa buntag.
Ang kapulisan pakyas sa pag-ila sa maong biktima nga nadasmagan sa usa ka Suzuki Raider nga gimaneho ni Gino Gonesto, 17, taga-Barangay Bae. Ang biktima daling gidala sa Deiparine Medical Clinic alang sa first aid apan gideklarar kini sa mananambal nga patay na.
Gawas ni Gonesto, laing angol mao sila si Lea Albiso ug Hazel Laroa, ug nadala sa Vicente Sotto Memorial Medical Center.
Matud ni SPO1 Jaime Mendoza, team leader, nga si Gonesto paingon na mupauli gikan sa Barangay Poblacion dihang kalit nga milabang sa dalan ang biktima hinungdan sa pagkaigo niini sa motorsiklo ug nalabay ang mga pasahero.
Sa laing bahin, usa ka 62- anyos nga lalaki patay dihang naligsan kini sa usa ka minibus pipila ka oras human sa naunang insidente sa national highway sa Barangay Sangat, San Fernando. Si Remeticado Perfecto Sasuman nakaangkon og grabeng samad sa kalawasan ug daling gidala sa Carcar Provincial Hospital apan nakabsan gyud kini sa kinabuhi human sa paglabay sa pipila ka gutlo.
Si Jodito Mahinay, 38, taga Barangay Bagakay, Barili ug drayber sa Chan Transit minibus (GXT-109) boluntaryong mitahan sa kapulisan sa Carcar City human sa hitabo.
Matud ni PO3 Julius Cesar Parages, traffic investigator, nga si Mahinay paingon sa habagatang bahin dihang kalit nga milabang si Sasuman ug wala niini mabantayi ang nagdagan nga minibus.
“Nikalit ra kuno og labang unya kusog ang dagan wala dayon ka-brake,†sigon ni Parages. (BANAT NEWS)