Nakuryentihan naugbok

CEBU, Philippines - Wala na makagradwar pa sa iyang pagka-electrician ang usa ka tinun-an human kini makuryentihi ug natagak nga nag-una ang ulo diha sa sementadong salog sa balay sa iyang magtutudlo pasado alas-10 sa buntag sa miaging adlaw diha sa sitio East Bunabag sa barangay Tayud sa lungsod sa Consolacion.

Ang biktima nailhan nga si Gerald Lauron, 20, molupyo sa La Purisima Guizo syudad sa Mandaue samtang usa kini siya ka 4th year student sa Mandaue City Comprehensive National High School sa dakbayan sa Mandaue nga mikuha og vocational course nga electrician.

Sa pakighinabi sa Banat News ni PO2 Giovanni Babano, mibutyag kini nga ang biktima gihangyo ni Virgilio Ruiz nga motaod og kuryenti sa iyang bag-ong gitukod nga panimalay.

Tuod man, ang biktima didto magsugod sa taas nga bahin sa panimalay apan sa kalit lang mao na lay nadunggan ni Ruiz ang dakong lagapak nga susama sa natagak nga butang.

Daling gisusi ni Ruiz ang dapit ug maoy iyang nakita ang naghapla na nga lawas sa biktima hinungdan nga dali usab kini nga gidala sa Mandaue City District Hospital apan gideklarar kini nga dead on arrival.

Matud pa ni Babano nga posibleng nakuryentihan ang biktima nga maoy hinungdan niini sa pagkatagak sa ubos ug maayong pagkabuak sa ulo niini tungod sa kakusog sa impact.  (BANAT NEWS)