CEBU, Philippines - Ang paggamit sa tanang kusog ug paningkamot aron masilbihan ang tanang kabus maoy maisugong awhag sa bag-ong regional director sa Department of Social Welfare and Development (DSWD-7)
Si Regional Director Mercedita P. Jabagat sa DSWD7 maoy mipuli kang Ma. Evelyn Macapobre kinsa tua idestino karon sa DSWD-6 sa syudad sa Iloilo.
Si Jabagat kinsa lumad nga taga Isabela ug kasamtangang nanimuyo sa syudad sa Davao sa una niyang pakig-atubang sa mga kawani sa buhatan sa DSWD7 nagkanayon nga kinahanglang ipatuman nila ang tanang programa alang sa poverty alleviation o paghaw-as sa kakabus sa mga molupyo sa Central Visayas.
Usa niini mao ang Pantawid Pamilyang Pilipino Program (4Ps)
Midugang siya nga gawas sa 4Ps aduna pay Kapit-bisig Laban sa Kahirapan-Comprehensive and Integrated Delivery of Social Services (Kalahi-Cidss) ug Sustainable Livelihood Program (SLP).
Iya usab nga gipasigarbo ang kamahinungdanon sa pagpakig-alayon ug pagpakig-alayon sa nagkadaiyang lokal nga goberno, National Government Agencies (NGAs) ug Non-government organizations (NGOs) tungod sa pagpaningkamot nga magmalampuson ang mga giumol nga programa sa kagamhanan sa nasud.
Si Jabagat naglista na og mga courtesy call o pagbisita sa mga mayor sa lungsod ug syudad ingon man mga gobernador sa probinsya ug mga representante sa distrito sa Central Visayas. (BANAT NEWS)