CEBU, Philippines - Pormal na nga milingkod kagahapon ang bag-ong Provincial Comelec Supervisor sa Sugbo nga si Atty. Eddie Abba.
Si Abba maoy silbing hulip kang Outgoing Provincial Comelec Officer nga si Atty. Lionel Marco Castiliano kinsa ibalhin isip Provincial Comelec officer sa lalawigan sa Bohol.
Si Comelec-7 Regional director Temie Lambino maoy mi-estalar kang Atty. Abba nga gitambungan usab ni Castiliano.
Gipasabot ni director Lambino nga ang gipatuman nga lahugay sa mga Provincial Comelec officer maoy pagtuman sa en banc resolution sa Comelec Manila nga gipangunahan ni Chairman Sixto Brillantes.
Matud pa ni Lambino nga ang tuyo niini mao nga malikay sa mga pasangil ug pagduda ang mga election officer nga adunay gipaboran nga politiko sa panahon sa eleksiyon.
Midugang si director Lambino isunod usab karong umaabot nga semana ang paglahugay sa mga election officer sa kalungsoran ug dakbayan ug gipaabot na lang nila ang en banc resolution alang niini. Si Castiliano usab mo-asumer karong adlawa sa iyang katungdanan didto sa Bohol. (BANAT NEWS)