Gwen miklarong wala siya mokanaog sa pagka-gobernador

CEBU, Philippines - Giklaro ni suspended governor Gwendolyn Garcia nga igo lamang siya nga migawas sa iyang buhatan aron pagtambong sa mga kalihukan sa kalungsuran sa habagatang bahin sa Sugbo ug wala siya mokanaug sa pagka-gobernador sa lalawigan.

Matud pa ni Garcia nga iyang  nahukman nga  bisitahon ang kalungsoran tungod kay daghang mga tawo na ang buot makakita kaniya human siya wala mobiya sa Kapitolyo sulod sa 42 ka adlaw gikan sa iyang pagkasuspenso niadtong Disyembre 19.

Kahinumduman nga sa tigum sa One Cebu Party niadtong Enero 26 gipadangat sa mga mayor nga sakop sa naasoy nga partido nga buot nilang makit-ang molibot sa lalawigan ang gobernador sama sa naandan na niining gimbuhaton.

Matud pa ni Garcia dugay na unta siyang mogawas aron pagduaw sa katawhan sa kalungsuran apan gipaabot niya ang hukom sa Court of Appeals labot sa iyang gipangayo nga Termporary Restraining Order kon TRO batok sa suspension sa Malacañang.

Sigon pa sa gobernador nga sa iyang hilom nga pagbiya sa iyang buhatan niadtong Martes sa gabii naglaom siyang makabalik ra siya ug dili sirad-an ang iyang buhatan.

Si acting governor Agnes Magpale mimando sa pagpasira sa buhatan sa gobernador sa Kapitolyo.

Si Garcia masaligon nga makabalik ra siya sa iyang buhatan sa higayon nga makakuha na siya og TRO gikan sa Court of Appeals.

Sa report sa Aksyon Bisaya News5 kagahapon, ang legal officer sa Department of Interior and Local Government region- 7, Atty. Ayesh Nogra, nagkanayon walay nalapas nga balaod si Magpale sa pagpasirado sa buhatan sa gobernador.

Matud pa niya nga isip acting governor, katungod ni Magpale ang paghukom kung unsaon niya pag-manage ang mga buhatan sulod sa Kapitolyo sa samang higayon, walay katungod ang usa ka suspendidong opisyal pag-okupar sa buhatan nga iya sa gobiyerno.  (BANAT NEWS)