Patay’ng lawas nakuykoyan sa iro

CEBU, Philippines - Usa ka patay’ng lawas ang nakuykuyan sa iro diha sa baybayon sa dagat sa Poblacion sa lungsod sa Argao kagahapon sa buntag.

Usa ka mananagat nga si Jimmy Mancao, 45, taga Sityo Looc, Poblacion maoy nakadiskubre sa patay’ng lawas sa biktima.

Matud ni PO2 Benjamin Gerozaga, desk officer sa Argao Police  Station dihang nahinabi sa Banat News ang maong mananagat paingon na untang mangisda nianang sayo sa kaadlawon kauban ang iyang iro.

Apan samtang diha sila sa baybayon atubangan sa Bantay Dagat Office nahibulong  siya nga dunay  gisigehan og simhot sa baybay ang iyang iro ug gikubkob og maayo ang balas hinungdan nga iyaha kining giduol ug gi-iwagan.

Nakalitan siya kay nigimaw na ang ulo sa usa ka tawo maong dali dayon niya kining gi-report sa kapulisan.

Dihang ilaha nang naugkat  ang patay’ng lawas nasuta nga usa kini ka lalaki nga nagsul-ob og maong pants ug dunay blue card gikan sa tambalanan nga may nakasulat nga pangalang  Reynaldo Carillo.

Sa gihimong pakisusi sa kapulisan nasuta nga dunay samad sa dughan ug ulo ang biktima nga maoy nakaingon sa hinanali niining kamatayon apan wala pa maklaru kun dinunggaban o pinusilan ba kini.

 Ang kapulisan padayon pa sa ilang imbistigasyon pagtino sa posibling foul play ug sa paghimo ning balita wala pay tagtungod ang ni claim niini. (BANAT NEWS)