Dasmag 8 patay 30 angol

CEBU, Philippines - Mikabat sa walo ka tawo  ang  namatay samtang  kapin kun  kulang 30  ang naangol  sa  dinasmagay  tali sa usa ka prime mover  ug sa bus pasaheroan  didto  sa sitio Gawaygaway, barangay Uling, dakbayan  sa Naga  kagahapon  sa alas 4:30 sa hapon.

Sa pagsulat  ning  maong  balita  wala pay  mga ngalan  nga  nakuha  ang  mga  polis  gikan  sa  mga  biktima.

Si Terry Bacarro, 55, taga  Gawaygaway  kinsa  nakasaksi  sa maong  hitabo  mibutyag  sa Banat News  nga  kusog  kaayo  ang  dagan  sa prime  mover  nga gikan  sa dakbayan  sa Toledo  nga nagkarga  og  bulldozer  samtang  ang  trak  pasaheroan  nga wala niya makuha  ang ngalan  gikan  usab  sa dakbayan  sa Sugbo.

Matud  pa  ni  Bacarro  nga  ang prime  mover  nga nawad-an  sa preno  wala  na mapugngi  sa drayber  ang dagan  niini  hinungdan  nga  midasmag  kini  sa gikasugat  nga bus  pasaheroan. Iyang  gisubay  nga  misuway  og  lihay  ang  pasaheroan  apan  gidaro  kini  sa prime  mover  busa  napasok  kini  sa daplin  sa karsada  ug  ang  drayber niini  ug  tanang walo ka pasahero nga naglingkod  dapit  sa front seat namatay  dihadiha.

Samtang  ang  mga 30  ka pasahero  gidala  dayon  ngadto  sa South General  Hospital  sa dakbayan  sa Naga  ug  sa Vicente  Sotto Memorial Medical  Center  sa dakbayan  sa Sugbo. Si Cerilo Geraldes, hingkod,  usa  sa  mga naangol  nga pasahero  nagkanayon  nga didto  siya  maglingkod  sa  kinaluyohang  bahin  sa bus  dihang  napiit  siya  hinungdan  nga  nabangog  siya  dihang  nalamba  sa bongbong  sa maong  bus  ang  iyang  ulo.

Sa pagsuwat  ning  maong  balita  padayon  pang  gihipos  sa kapolisan  ang  mga  ngalan  sa  mga  biktima  nga  patay  ug  naangol. (BANAT NEWS)