CEBU, Philippines - Kapin usa ka gatus ka libo ka pesos ang nasakiyo sa nag-motor nga tulisan dihang gitulis ang negosyante og hayopan sa national highway sa barangay Baclayan sa lungsod sa Boljoon niadtong Martes sa hapon.
Ang biktima mao si Oscar Paras, 42, taga Poblacion Uno siyudad sa Carcar ug usa ka livestock buyer samtang duha ka mga tulisang sakay sa usa ka motorsiklo ang gitumbok nga responsable sa krimen.
Matud ni SPO2 Roderick Roma sa Boljoon Police Station dihang nahinabi sa Banat News subay sa inisyal nga imbestigasyon ang biktima nga sakay sa iyang multicab uban sa iyang drayber nga si Artemio Navio, 29, taga Bolinawan siyudad sa Carcar ang gikan kini nangompra og mga hayop sama sa kanding didto sa lungsod sa Oslob. Samtang nagdagan kalit lang dunay ni-overtake nga nagmotor ug mibabag kanila dayong deklarar og tulis ug gikuha ang ilang P111,300 mil nga ilang puhonan.
Ang biktima daling nidangop sa buhatan sa kapulisan ug igo nalang sapagpa-blotter sa hitabo, gisuwayan unta sa pagbutang og roadblocks sa mga lutsanan sa lungsod sa Alcoy ug Oslob apan pakyas kini. (Darrel A. Carumba/EIM) (BANAT NEWS)