109.45 kilometro nga dalan gisuportahan sa RDC-7

CEBU, Philippines - Gisuportahan sa Regional Development Council 7 ang pagpanindot sa karsada gikan sa dakbayan sa Sugbo padulong sa tumoy sa Hagnaya sa lungsod sa San Remegio sa amihanang bahin sa lalawigan sa Sugbo.

Kini human ang mga lokal nga kagamhanan sa Probinsiya sa Sugbo, ug mga dakbayan sa Sugbo ug Mandaue ang nipaluyo usab sa maong proyekto.

Giaprobahan sa RDC 7 ang rekomendasyon sa Infrastructure Development Committee sa niagi nilang tigum sa Sugbo.

Ang maong dalan adunay gitas-on nga 109.45 kilometros subay sa mga dakbayan sa Sugbo, Mandaue, Danao ug Bogo, ug sa mga lungsod sa Consolacion, Liloan, Compostela, Carmen, Catmon, Sogod, Borbon, Tabogon ug San Remegio.

Tuyo sa pagpanindot sa maong dalan mao ang kahapsay na unya sa mga motorista ug mapadali ang pagbiyahe sa mga negosyo lakip na sa mga turista.

Gigamit usab ang maong dalan sa mga biyahidor gikan sa mga lalawigan sa Masbate, Leyte ug Samar gumikan sa mga pantalan sa dakbayan sa Bogo ug Hagnaya, San Remegio.

Mokabat sa P1.3 bilyones ang bana-banang gastohon sa maong proyekto apan sa gihimong pakisusi sa Department of Public Works and Highways, pipila ka bahin sa dalan ang gipanindot sa pagkakaron.

Nigasto na ang gobiyerno balor og P812.5 milyones sa niaging tuig samtang ang gobiyerno may gahin na nga P232.275 milyones alang ning tuiga alang sa 13.66 kilometros.

Hinungdan nga ang nahabiling 22.55 kilometros ang gahinanan pa og pondo balor og P351.2 milyones nga maoy giendosar sa RDC 7 alang sa sunod tuig nga gahin. - /EIM (BANAT NEWS)