CEBU, Philippines - Drayber sa habal-habal gibakwian sa iyang motorsiklo sa mga tulisan nga iyang pasahero niadtong Biyernes sa gabii diha sa barangay Dumlog, dakbayan sa Talisay.
Ang biktimang si Degie Horandoy, 23, kagahapon sa buntag ra kining mi-report ngadto sa Talisay City Police Station diha sa barangay Poblacion sa maong hitabo.
Gidagit sa duha ka mga wala mailhing tulisan ang Honda XRM ni Horandoy nga dunay temporaryong plaka nga 7TCP-4355.
Sa imbestigasyon ni PO1 Stephen Sefuesca nga ang maong mga tulisan nagpakaaron-ingnong mga pasahero ug misakay kang Horandoy diha sa Tabunok ug nagpahatud ngadto sa barangay Dumlog.
Apan sa pag-abot nila diha sa ngitngit ug mingaw nga lugar sa Dumlog usa sa maong mga tulisan mition kang Horandoy og pusil ug mideklara nga tulis dayon gipakanaog ang biktima sa motorsiklo niini.
Gihulagway ni Horandoy nga usa sa maong mga lalaki kasarangan ang gidak-on sa lawas ug ang usa bus-okon kini ug parehong kasarangan usab ang gitas-on sa pamarog.
Ang kapolisan nagpahigayon og follow-up operation sa maong insidente. (EIM)(BANAT NEWS)