CEBU, Philippines - Maayong pagka-igo sa dughan sa usa ka barangay tanod sa barangay Jomgao lungsod sa Argao human kini gipusil pasado alas-11 sa miaging gabii.
Ang biktima nailhan nga si Nicholas Manson Plaza, 47, usa ka barangay tanod sa maong lugar samtang ang suspetsado nailhan usab nga si Rosel Lopez Remoroza, 35.
Sa inisyal nga imbestigasyon sa kapolisan nasayran nga ang biktima diha sulod sa ilang panimalay dihang kalit lang mipatim-aw ang suspetsado.
Sa pagtuo nga kini walay dautang intensyon gikatahong gi-abi abi pa kini sa biktima apan giingong kalit lang gidul-itan og pusil sa dughan si Plaza nga maoy hinungdan sa hinanali niining kamatayon.
Ang suspetsado boluntaryo usab nga mitahan sa iyang kaugalingon ngadto sa awtoridad. Sa pakighinabi sa Banat News ni SPO1 Renato Nacaytona, sa Argao Police misaysay nga tungod lang sa gihulagway nga kahambogero sa biktima maoy na-ingnan sa suspetsado nga gipusil niya kini.
Matud pa ni Nacaytona nga sa dihang iyang nahinabi ang suspetsado gikatahong mitug-an kini nga naglagot siya niini tungod sa kahambogero. Gihulagway ni Nacaytona nga bagsikon kung molakaw ang biktima apan giingong maayo kini og kinaiya sa mga silingan gawas lang niadtong wala kaayo makaila kaniya. (Lesley Caminade-Vestil/EIM) (BANAT NEWS)