Alahas sa Birhen sa Regla gikawat

CEBU, Philippines -  Wala  pa masuta kun pila ka milyon ka pesos  ang  kantidad sa mga alahas sa Mahal nga Birhen sa Regla sa dakbayan sa Lapulapu nga nawagtang human  lungkaba ang urna  niini sulod sa National  Shrine sa barangay Poblacion sa maong dakbayan.

Ang  gisakiyo  sa wala  hiilhing  kawatan  mao  ang  69 ka kuwentas  nga pulos  may pendant, 60 ka singsing ug 70 ka bracelet nga ang  tanan  pulos pure  nga bulawan.

Ang caretaker sa maong simbahan nga si Hiram Miranda maoy unang nakadiskobre sa pagkahanaw sa mga ahalas sa Mahal nga Birhen sa Regla  kagahapon  sa buntag  kinsa  wala  usab  masayud  kun  kanus-a  pa nawagtang  ang  maong  mga  butang.

Si Senior Inspector Christian Torres, imbestigador sa Theft and Robbery Section sa kapolisan sa Lapulapu City Police Office nga nahinabi sa Banat News miingon nga si Miranda nakasulod sa kapilya nga nahimutangan sa urna sa  Birhen   kay nanglimpiyo siya   sa maong lugar.

Dugang pa ni Sr. Ins. Torres nga wala si Padre Jimmy Duero ang  parish priest  sa maong parokya dihang nadiskobrehan  nila  kagahapon  ang pagkawagtang  sa maong  mga alahas  sa Birhen

Si Padre Agustin Capulong nga maoy assistant  parish priest nagkanayon  nga  out of town   si padre.

Si Padre  Capulong dili usab makahatag sa tukmang kantidad sa maong mga alahas nga gikawat sanglit kadtong tanan pulos donasyon gikan sa mga deboto sa Mahal nga Birhen  sukad pa sayo sa mga tuig  1960.

Dugang nga gitug-an ni Padre Capulong nga gilungkab  kuno  usab  ang donation box nga gisudlan sa  wala pa matataw nga kantidad kay sukad pa kadto sa pagsaulog sa miaging piyesta nga wala nila kaablihi.

Gitataw ni Sr. Ins. Torres  nga ang mga kawatan wala mag-agi og pultahan sa pagsulod sa urna sa  Birhen tungod kay sirado man kini ug  ang mga Parish Security Guard  maoy nagkupot sa  yawe niini.

Matud pa niya nga lisod usab ang pag-agi sa kawatan sa kisame sa maong simbahan kay adto man kini mag-agi sa kampanaryo ug nagkinahanglan pa ang pagkatkat sa habog nga pader  niini.

Dugang pa niya nga adunay CCTV camera sa nahimutangan sa Birhen   apan wala na  kini gamita kay  naguba  na. Sa laing  bahin giawhag  ni Mayor Paz Radaza  nga kun mahimo ang tanang  pari sa Lapulapu lakip  kaniya  mopaubos   sa polygraphic test uban sa  tanang sakop sa maong simbahan sa pagsuta kun kinsa gayuy  nagkawat  sa mga alahas  sa Birhen. (/WC) (BANAT NEWS)