Mananagat nag-sideline pamaligya’g shabu tiklo
CEBU, Philippines - Nasikop sa kapolisan ang usa ka mananagat nga nag-sideline pagpamaligya uog shabu atol sa buy-bust operation nga gilusad sa kapolisan didto sa Sitio Pulo, barangay Baliwagan, sa lungsod sa Balamban kagahapon sa alas 12:30 sa udto.
Ang nadakpan mao si Remilgildo Dumdu, 42 , minyo, nagpuyo sa maong lugar, usa ka mananagat apan nag-sideline pagpamaligya og shabu.
Nasakmit sa kapolisan gikan kaniya mao ang usa ka pakite sa gituohang shabu ug P350 nga buy-bust money.
Apan dihang girekisa kini sa kapolisan nasigmit pa gyud ang dugang tulo ka pakite nga shabu gikan sa iyang bulsa.
Si PO1 Johnrel Romero sa Balamban Police Station mibutyag sa Banat News nga sayo niini nakadawat og taho ang kapolisan bahin sa illegal pamatigayon sa suspek sa pagpamaligya og gidling drugas sa maong lugar.
Daling mipahigayon ug operasyon ang kapolisan pinaagi sa buy-bust diin polis gihapon ang nagsilbing puseur buyer.
Dihang gidawat sa suspek ang P350 nga silbing bayad sa usa ka pakiteng shabu nga iyang gitunol ngadto sa poseur buyer, diha-diha giwiktan og posas ang pulso niini ug nasikop sa akto sa iyang sideline.
Ang suspek nagkagulkol na karon sa karsel ug gitakdang pasakaan kini og kiha karong adlawa. (/WC) (BANAT NEWS)
- Latest
