Videokihan duol sa sam-ang girapido

CEBU, Philippines - Duha ka babaye ang naangol human gipamusil sa videokehan nga duol sa public cemetery sa sitio Humay-Humay, barangay Gun-ob sa dakbayan sa Lapulapu alas-3 pasado ang takna sayo sa miaging kaadlawon sa pagsaulog sa Todos Los Santos.

Ang gipamusil mao sila si Irene Montero, 39, tag-iya sa videokehan ug Dayan Cano, 20, nagtrabaho isip waitress sa maong videokehan nga nahimutang sa maong dapit.

Duha ka batan-ong lalaking nagmotorsiklo ug nagsuot og helmet ug itom nga jacket mao ray paghulagway sa mga gikatahapan.

Si PO2 Winston Ybañez sa Homicide Side Section sa kapolisan sa maong dakbayan nga nahinabi sa Banat News miingon nga sa ilang imbestigasyon nga gihimo ilang nasuta nga gitaliwad-an sa duha pa ka laing videokehan ang videokehan ni Montero.

Giingong pulos dunay customer ug may nanganta nianang tungora sa maong mga videokihan maong gisalikway ang posibilidad nga gibanhaan ang maong mga gikatahapan sa kasaba sa videoke.

Matud pa ni Ybañez gikan mikuha og beer si Montero dihang nangabot ang mga lalaki ug kalit nga mirakrak sa videokihan maong nagkatibulaag ang mga tawo.

Diha na masayring naigo sa paa si Montero samtang sa bukton usab naigo si Cano ug ang duha gidala sa tambalanan samtang gisubay pa ang motibo sa pagpamusil. (/EIM) (BANAT NEWS)