CEBU, Philippines - Talandugon ang kahimtang sa 29-anyos nga drayber sa motorsiklo human kini magkadinasmagay sa gikasugat nga multicab sa highway sa Poblacion lungsod sa Daanbantayan niadtong Biyernes sa alas 7:00 sa gabii.
Ang biktima nga maoy nagmaneho sa motor giilang si Elpidio Pereno, nagpuyo sa barangay Pajo, Daanbantayan. Samtang ang drayber sa gikadinasmagay niini nga multicab mao si Benjamin Alindajao, 29, taga Poblacion lungsod sa Medillen.
Matud ni PO1 Brian Densing sa Daanbantayan Police dihang nahinabi sa Banat News gikan sa Kawit, Medillen ang multicab paingon sa barangay Tapilon, Daanbantayan samtang gikan ang biktima sa barangay Agujo paingon sa Poblacion sugat nga direksyon.
Apan pag-abot sa maong lugar gikatahong mi-overtake og traysikad ang multicab ug pagkawat sa pikas linya naatol nga maoy pag-abot sa biktima ug nasungag kini.
Ang biktima daling gidala sa Daanbantayan District Hospital samtang ang drayber sa multicab mitahan sa iyang kaugalingon. (Darrel A. Carumba/EIM)(BANAT NEWS)