Red Flags bantayan, pagsakiyo pasagdan

Giawhag sa Malacañang ang mga civil society groups (CSGs) sa pag-tabang pag-ila ug pagbantay sa mga posible'ng “red flags” sa P7.2 trillion 2027 national budget aron maseguro ang transparency ug efficiency sa pag-gasto sa pundo sa gobyerno.  Ang ehekutibo man ang misumiter sa maong budget ngadto busa labaw unta silang nasayod kon hain dapita niini ang medyo “lahap” busa maingon nato nga minaot kining maong awhag.  Komento pa sa akong amigo, “Ang mga “red flags” ra ang pabantayan sa Malacanang, apan ang ilang pagsakiyo unya sa budget, pasagdan.”  Fezteleern!

Compromise sa budget

Sumala ni Senate President Sherwin Gatchalian, tangtangon sa Senado ang 295 ka mga infrastructure projects sa 2027 national budget nga nagkantidad og P8.836 billion tungod sa kakulang niini sa saktong dokumentasyon.  Dili layo nga mahitabo nga panalipdan sa kongreso ang ilang bersyon sa 2027 budget diin nasayran nga labihan kadaghan ang insertions.  Segun sa kasinatian, aduna gayo’y compromise nga mahitabo tali sa kongreso ug senado.  Matud pa sa akong amigo, “Ang resulta unya sa kompromiso mao nga ang matag habig makakuha, dili lang sa katunga, kon dili, doble pa hinoon sa ilang gusto.” Madahaan!

I-uli sa bugan

Miawhag ang Chinese top diplomat nga si Wang Yi, nga rendahan sa Pilipinas ang mga politiko nga padayon kuno nga “nagmantsa” sa Beijing ug “milabang sa “pula nga linya” niini, gumikan lang sa ilang politikanhong pagpihig.  Bisan maingon nato nga nagkiat lang usab ang uban natong politiko, dili makabu-ot ang China kon unsaon sa Pilipinas pagdumala ang iyang internal nga kalihokan.  Makapahinumdum sa inahan nga kon maglagot na siya sa iyang mga bata, modayon og ingon nga, “Hibaw-an pa diay nga ingon niana diay mo kasi-aw, may’pag gipang-uli ta mo sa akong bugan.”  Ateerr!

Ang suliran maoy sulbad

Nag-umol ang kagamhanan sa dakbayan sa Sugbo og usa ka special task force nga maoy mangulo pagpaningkamot nga mahibalik ang gimando nga 3-meter easement sa mga kasapa-an ug mga drainage channels isip kabahin sa kampanya batok sa suliran sa baha.  Mahinumduman nga dili na kini bag-o nga programa.  Gani, daghan ang legal ug institutional nga suliran nga nasugatan sa maong program labi na ang kalisod sa paghawan ug pagbalhin sa namuyo mismo sa kilid sa sapa.  Komento pa sa akong silingan, “Dili task force ang maka-recover sa easement sa sapa kon dili usa ka dakong baha.  Busa ang suliran mao ra usab ang sulbad.”  Muleeng!

Bulsa ang moburot

Matud pa ni House Minority Leader ug 4Ps party-list Rep. Marcelino Libanan, adunay giproponer nga P17.8 billion nga pundo sa 2027 national budget nga gitagana alang sa paghatag og masustansyang pagkaon sa mga undernourished nga kabataan sa mga publikong tulonghaan.    Mao kini matang sa budget nga sayon kaayo sakiyohon tungod kay mga bata ang gitumbok kunohay nga beneficiary busa dili pa maantigo maningil.  Mao kana’y giingon nga, “Kon mapasar kining maong budget, inay kabataan ang manambok, ang bulsa lang sa mga politiko ang moburot.”  Pagkatoytoy!