Marcos nia karon sa Sugbu

CEBU, Philippines — Moanhi sa Cebu si Presidente Ferdinand R. Marcos Jr. karon adlawa, Miyerkules, Oktubre 14, aron manguna sa pagbukas sa National Public Employment Service Office (PESO) Congress ug motambong sa paglusad sa tulo ka bag-ong flagship innovations sa Tulong Panghanapbuhay sa Ating Disadvantaged/Displaced Workers (TUPAD) program sa DOLE.

Ang National PESO Congress himuon sugod karong adlawa Oktubre 14 hangtod 16 magtigom sa mga PESO managers, Job Placement Officers, lokal nga opisyal ug uban pang employment stakeholders aron palig-onon ang employment facilitation ug koordinasyon tali sa mga jobseeker ug employers.

Importante usab ang papel sa PESO sa pagtabang sa mga mamumuo, ilabina sa mga OFW nga nanguli tungod sa krisis sa Middle East.

Sa maong kalihokan, ilusad ang tulo sa pito ka flagship innovations sa TUPAD—SkillPass, Trabahong-Dagat-Kabataan Para sa Blue Economy, ug Sagip-Trabaho. Ang SkillPass magdokumento sa mga skills ug work experience sa TUPAD beneficiaries aron mas dali silang ma-link sa training, certification, trabaho o livelihood.

Ang Trabahong-Dagat motabang sa mga komunidad sa kabaybayonan pinaagi sa skills training, trabaho ug livelihood opportunities sa fisheries ug blue economy.

Samtang, ang Sagip-Trabaho maghatag og wage subsidy sa kwalipikadong micro, small and medium enterprises (MSMEs) aron mapadayon ang trabaho ug malikayan ang pagsira sa negosyo. Ang tulo ka inisyatiba kabahin sa paningkamot sa DOLE nga himoon ang TUPAD nga dili lang temporaryong trabaho, kundili usa ka tulay padulong sa mas lig-on nga panginabuhian ug permanenteng employment. IBM BANAT NEWS