Traffic enforcer sa TEAM nga niabusar taktakon

CEBU, Philippines — Tangtangon sa Traffic Enforcement Agency of Mandaue (TEAM) ang usa ka traffic enforcer niini tungod sa giingon pag-abusar sa iyang awtoridad samtang off duty.

Sa interbyu kagahapong adlawa, Septiyembre 28, miingon si TEAM head Hyll Retuya nga ang job order personnel  nasakpan sa video nga nag-isyu og citation ticket ngadto sa usa ka motorista bisan pa og off-duty siya niadtong Sabado sa gabii, Septiyembre 26, 2026.

Matud ni Retuya, gipanghambog usab ni    nga iyang apelyido “Ouano” atol sa iyang komprontasyon sa motorista sa maong insidente sa Barangay Opao.

Giangkon sa enforcer kang Retuya kagahapon sa buntag nga nakainom siya og ilimnong makahubog dihang nag-isyu siya sa citation ticket ug mikuha sa lisensya sa motorista.

Matud ni Retuya, nagsugod ang insidente human giingong ni-overtake ang motorista nga si Christian Camilo Charcos  ang enforcer diha sa G. Ouano St. sa Barangay Opao, nga maoy hinungdan nga giatubang ug gidakop sa ulahi ni Ouano ang motorista.

“Upon seeing the video, sala gyud sa among personnel. From the very first place, dili siya dapat manakop when off -duty. Second, hubog pa gyud siya. Mao nay naka pa worsen sa situation ba,” matud ni Retuya.

Matud sa traffic head, base sa mga pahayag sa biktima ug sa enforcer, gikan kini sa usa ka fiesta sa barangay diin siya nakainom.

Samtang, ang motorista nga si Charcos nagkuha sa iyang ig-agaw.

“According sa victim, ang nahitabo ana naka overtake siya sa among enforcer. But according sad sa enforcer, nga gibanggaan daw siya maong iyang gigukod unya na corner niya didto na dayon ilang altercation,” matud ni Retuya.

Apan gilimod ni Charcos ang alegasyon sa enforcer nga iyang nabanggaan ang motorsiklo niini. Matud usab sa motorista, wala siya’y tuyo nga mo-overtake sa TEAM enforcer.

Giklaro ni Retuya nga gidili sa TEAM ang mga personnel niini sa pagpatuman sa mga balaod sa trapiko kung off duty sila.

Dili usab sila tugotan nga magdala og citation tickets ug radyo gawas sa ilang opisyal nga katungdanan.

Matud niya, nagpatuman ang ahensya og zero-tolerance policy batok sa korapsyon ug pag-abuso sa awtoridad sa ilang mga personnel.

“Zero tolerance ko anang corruption, maong every time naay ma involved gyud ani expect for the worse nga mahitabo especially nga maabot sa akoa… dili na nato piyongan gyud,” matud ni Retuya.

Apan miingon si Retuya nga klaro sa video nga bisan wala magsul-ob og uniporme  nagdala gihapon kini og citation tickets ug radyo.

“Murag naa gyud tingale daotan nga intention ba, when dapat dili na ingon ana, dad-on na if on duty ra,” matud ni Retuya.

Matod ni Retuya, nakigkontak ang TEAM sa biktima niadtong Domingo, Septiyembre 27, ug gi-clear ang iyang rekord.

“Gi-adjudicate gyud to nako iyang dakop kay that was invalid. Dili siya balido bisan asa nato tan-awon,” matud ni Retuya.

“Ako, kuhaon ko ni nga opportunity nga mangayo og pasaylo sa victim nga student pa ‘to siya. Sala gyud ‘to sa among enforcer,” matod ni Retuya.

Gidugang niya nga ang mga traffic enforcers kinahanglan mahimong ehemplo sa pagpatuman sa balaod ug gilauman nga magpakita og hustong pamatasan bisan kung off duty.  “We should be at the very least be role model sa katawhan, especially sa traffic. Unsa may purpose nga kami ang mo enforce sa traffic laws, pero kami mismo ang number one violator. Di gyud na pwede sa amoa,” matud ni Retuya. Naghulat na karon ang ahensya sa opisyal nga aksyon sa Human Resources Office kalabot sa pagtangtang sa enforcer sa serbisyo.— IBM BANAT NEWS