Kalbaryo ni Sara

Kon gamay nang tan-awon ang 14 ka boto pagkonbikto ni Bise Presidente Sara Duterte impeachment trial, dili pa kana mao. Mahimong 13 na lang ang ? majority vote kon:

• Dunay lain nga mapasakaan og kasong plunder (wala pa maseguro unsay mas unang mahingpit sa Ombudsman, ang mga anomaliya ba sa Taguig City o ang kuwestiyonable bang mga gasto sa Phisgoc (Philippine Southeast Games Organizing Committee); ug

• Dunay lain nga maluwatan og warrant of arrest gikan sa International Criminal Court tungod sa kasong crimes against humanity ni kanhi presidente Rodrigo Duterte.

-o0o-

Tungod sa mas dakong kahigayonan nga makonbikto ang sinumbong, mapaabot nato sa mosunod nga mga adlaw ang mosunod:

• Modangop si VP Sara sa Korte Suprema aron pag-awhag nga hunungon ang impeachment trial tungod sa grabeng pangabuso (grave abuse of discretion) sa mayoriya sa senator-judges; ug

• Kon mobalik ang minority bloc pagtambong sa husay sunod semana human sa ilang walkout niadtong Miyerkules, gamiton nila ang tanang taktika aron paglangay, paglibog, ug paglawgaw sa mga ebidensiya ug mga testigo sa prosekusyon aron pagkumbinser sa katawhan sa dili pagsalig sa proseso.

-o0o-

Ang pagboykot o pagpasiugda og laing walkout sa impeachment trial dili madanihon para nagkanihit nga mga sumusunod ni Senador Alan Peter Cayetano kay:

• Dili mainutil ang husay kay seguro man ang quorum, labi na kon si Senador Mark Villar mopaundayon sa iyang bag-ong postura sa pagkuyog sa majority bloc; ug

• Mas paspas ug mas klaro na hinuon ang mga ebidensiya batok ni VP Sara kay dili na man nila mahasi ug ma-insulto ang prosekusyon.

-o0o-

Gamay rang kahigayonan nga makumbinser ni VP Sara ang Korte Suprema sa pagluwas niya kay:

• Mainampingon ang senator-judges nga nihanig sa ilang desisyon pagpaubos sa numero sa pagkonbikto pinaagi sa pagpaminaw sa ligdong nga legal opinion sa retiradong mga mahistrado sa Korte Suprema; ug

• Mayoriya sa mga mahistrado (10 ang kataposan banabana) nagplano pagpangaplay sa mabakanteng lingkoranan ni Chief Justice Alexander Gesmundo nga moretiro karong Nobyembre 6, sa ato pa dili ganahang mohimo og desisyon batok sa administrasyon nga peligrong makaiban sa ilang kahigayonan nga matudlo sa kinatas-an nga puwesto nga gidamgo sa kinabag-an sa mga abogado ug abogada.