Righ-of-way acquisition nakalangay sa implementasyon sa CBRT

CEBU, Philippines — Gibutyag ni Cebu City Mayor Nestor Archival, Sr. nga ang pagproseso sa right-of-way acquisition sa F. Vestil Road paingon sa South Road Properties ang usa sa nakapalangay sa implementasyon sa Cebu Bus Rapid Transit (CBRT) project.

Matud ni Archival nga mao kini nag-unang isyu nga ilang natuki uban ang Regional Project Monitoring Team sa Regional Development Council (RDC)-7.

Ang mayor nagkanayon nga adunay P900 milyones nga pundo nga gigahin ang nasudnong kagamhanan alang sa ROW acquisition ug katunga niini ang na-download na ngadto sa kagamhanan sa Dakbayan sa Sugbo aron gamiton sa pagbayad sa mga apektadong tag-iya sa yuta ug mga istraktura.

Giangkon ni Archival nga bisan og andam na ang syudad sa pagbayad sa mga apektadong tag-iya sa mga panimalay, yuta, ug istraktura apan hinay gihapon ang proseso sa proyekto tungod kay ang mga dokumento nga gigamit sa pagproseso sa bayad anaa ubos sa ngalan sa niaging mayor. Kasamtangang gimandoan ni Archival ang Department of Transportation (DOTr) ug ang grupo sa kagamhanan nga naglihok sa CBRT project nga paspasan ang pagproseso sa pag-usab sa mga dokumento ngadto sa ngalan sa kasamtangang mayor aron mabayran na ang mga apektadong tag-iya tungod kay adunay kondisyon ang pagpagawas sa nahibiling pundo nga kong dili mabayran ang mga tag-iya ug dili makompleto ang paggamit sa unang na-download nga pundo, dili na mahimong ma-download ang nahibiling bahin sa pundo.

Laing hinungdan usab nga gisaysay ni Archival mao nga adunay 55 ka property owners nga maapektohan sa proyekto ug dili tanan andam nga ibaligya ang ilang kabtangan.

Si Archival nagkanayon nga mapugos ang siyudad nga magpahigayon og expropriation proceedings batok sa mga tag-iya nga dili mosugot sa boluntaryong pagbaligya sa ilang yuta.

Kini nga paagi, mapaspasan ang pag-angkon sa mga yuta ug masiguro ang kooperasyon sa tanang tag-iya aron nga hingpit na nga mapadayon ang maong proyekto. — /BDB (BANAT NEWS)