LTFRB nipalig-on sa Anti-Distracted Driving Act

CEBU, Philippines — Gipahimangnoan sa Land Transportation Franchising and Regulatory Board (LTFRB) ang mga drayber sa public utility vehicles (PUVs) nga likayan ang pag-vlog, paghimo og social media content o paggamit sa social media samtang nagmaneho.

Sa pahayag sa LTFRB, subay sa giya ni Department of Transportation (DOTr) Secretary Giovanni Lopez gipahinumdoman ang mga drayber ug operator nga ang paggamit og mobile devices alang sa paghimo og content samtang nagmaneho gidili ubos sa Akta Republika No. 10913 kun “Anti-Distracted Driving Act”.

Si Atty. Vigor D. Mendoza II, chairman sa LTFRB nagkanayon nga gipalig-on sa ahensiya ang pagpatuman sa maong balaod aron mapanalipdan ang mga pasahero, pedestrian ug ubang tiggamit sa dalan batok sa mga aksidente nga resulta sa distracted driving.

Matud ni Mendoza nga ang inisyatibo nahiuyon sa direktiba ni Presidente Ferdinand “Bongbong” Marcos, Jr. sa hugot nga pagpatuman sa mga balaod ug regulasyon sa kaluwasan sa kadalanan sa tibuok nasud.

Aron mapalig-on ang pagsunod sa balaod, giandam na sa LTFRB ang memorandum circular nga nagmando sa mga operator sa PUV nga sigurohon nga ang ilang mga drayber hugot nga motuman sa maong balaod.

Matud sa LTFRB nga ang maong lakang gipasiugdahan tungod sa nagkadaghang mga drayber sa PUV nga naghimo ug nag-vlog ug uban pa’ng social media content samtang nagmaneho.

Ang maong mga binuhatan dili lang paglapas sa balaod napakyas usab sa katuyoan niini nga mapugngan ang mga kadaot ug kamatayon nga resulta sa distracted driving.

Ug ang pagpahigayon sa maong mga kalihokan naglapas sa batakang kondisyon sa matag Certificate of Public Convenience (CPC) nga nagmando sa mga operator ug drayber nga unahon ang kaluwasan ug kasayon sa nagbiyahe nga publiko.

Ubos sa gisugyot nga memorandum circular ang mga drayber sa PUV nga masakpan nga mag-vlog, naghimo og content o nag-apil sa mga kalihokan sa social media lakip ang pag-browse, pag-scroll, pag-like, pag-comment o pag-interact sa mga social media applications samtang nagmaneho pabayaron og P5,000 nga multa.

Gibutyag ni Mendoza nga ang memorandum circular anaa na sa kataposang yugto sa pagproseso ug mahimong epektibo human kini mapatik sa mga mantalaan nga adunay kinatibuk-ang sirkulasyon ug makompleto ang ubang gikinahanglang legal nga proseso. — /BDB (BANAT NEWS)