Visayas nagpabiling ubos sa yellow alert

CEBU, Philippines — Nagpabilin ubos sa yellow alert ang Visayas grid gikan alas 3:00 sa hapon hangtud sa alas 9:00 sa gabii kagahapon tungod sa kakulang sa operating reserves taliwala sa taas nga panginahanglan sa kuryente ug sa pagkadili magamit sa daghang dagkong power plants.

Base sa advisory sa alas 8:00 sa buntag, ang available capacity sa grid anaa sa 2,691 megawatts (MW) samtang ang peak demand gilaoman nga moabot sa 2,594 MW.

Matud sa National Grid Corporation of the Philippines (NGCP) nga 12 ka power plants nagpabiling ubos sa forced outage sukad sa Mayo 2026, diin usa niini sukad niadtong Marso 2026, tulo sukad sa 2025, duha sukad 2024, duha usab sukad sa 2023 ug usa usab sukad sa 2021.

Ang 10 ka power plants ang nag-operate sa ubos nga kapasidad nga niresulta sa total nga 846.3 MW nga dili magamit sa grid.

Lakip sa mga hinungdan nga gisubay sa pagdeklara sa yellow alert mao ang padayon nga pagkadili magamit sa dagkong coal-fired power plants, ilabi na ang TVI 1, TVI 2 ug PEDC 3 ug ang taas nga forecasted system demand sa Visayas.

Ang yellow alert ipagawas kong ang operating margin dili igo aron matubag ang contingency requirement sa transmission grid nga nagpasabot nga gamay ang suplay sa kuryente apan dili kini pasabot nga siguradong adunay brownout.

Samtang, si DOE Undersecretary Patrick Aquino, director sa Energy Utilization Management Bureau (EUMB) sa Department of Energy (DOE) nagkanayon nga target sa DOE ang 10 hangtud sa 20 porsyento nga pagkunhod sa konsumo sa kuryente pinaagi sa padayon nga energy conservation ug efficiency programs isip kabahin sa mas lapad nga paningkamot sa pagdumala sa demand ug pagpalig-on sa grid reliability.

Si Aquino nagkanayon nga nakigtambayayong ang ahensiya sa dagkong end-users aron magamit ang ilang “deloading” capacities pinaagi sa boluntaryong pagkunhod sa konsumo o pinaagi sa pag-apil sa Interruptible Load Program (ILP) diin ang pipila ka pasilidad mogamit sa backup power panahon sa peak demand.

Giawhag usab sa DOE ang mga end-users nga adunay available rooftop spaces nga mag-instolar og renewable energy systems ilabi na ang solar isip kabahin sa paningkamot sa pag-decentralize sa power generation ug pagpalambo sa efficiency.

Ang energy conservation initiatives ipatuman usab sa mga government facilities ug padayon nga gihimo ang building-to-building energy audits aron mahibaw-an ang mga paagi sa pagpakunhod sa konsumo sa kuryente ug fuel. BDB BANAT NEWS