SK officials sa Labangon gustong ipaimbestigar

CEBU, Philippines — Mga sakop sa Sangguniang Kabataan (SK) sa Barangay Labangon gustong paimbestigahan sa us aka concerned citizen kang Cebu City Sangguniang Kabataan Federation (SKF) President Rhea Jakosalem.

Ang concerned citizen nga si Jonel Saceda nga mas nailhan sa publiko isip si Inday Josa Chiongbian Osmeña nanawagan kang Jakosalem nga pa-imbestigaran ang giingong kontrobersiya nga naglibot sa SK sa maong barangay.

Sa iyang taas nga Facebook post, gipadayag ni Saceda ang iyang kabalaka ug kasubo sa kahimtang sa SK Labangon ubos sa pagdumala ni SK Chairman Kim Kyle Buendia nga iyang giakusahan wala nakabuhat sa iyang katungdanan alang sa kabatan-onan.

“I write this letter not out of hatred, but out of deep concern and disappointment for the youth of Barangay Labangon. I write this not only as a concerned citizen, but as someone who genuinely loves this barangay and believes that the youth deserve leaders who are responsible, transparent, and accountable,” sulat pa ni Saceda sa iyang post.

Dugang pa, dugay na matud pa ang mga reklamo ug kontrobersiya diha sa SK Labangon sukad pa sa miaging tuig, lakip na ang giingong way pagpakabana ug kapakyasan sa pagtuman sa mga obligasyon isip opisyal.

Gibutyag usab ni Saceda aduna sa’y kakuwang sa direktang komunikasyon ngadto sa buhatan ni Jakosalem mao nga napugos kini sa pagpangayo og tabang kang Rizel Saladaga aron mapaabot ang mga yangungo ug pangutana kabahin sa aksyon nga buhaton sa pederasyon.

Si Saceda nagkanayon nga adunay gipatawag nga closed-door meeting ang SKF President pipila ka bulan ang milabay aron hisgutan ang mga isyu sa SK Labangon.

Apan, giingong wala motambong si Buendia uban sa pipila ka konsehal, ug upat lamang ka miyembro sa konseho ang nitunga. Bisan pa man og gihatagan og laing higayon aron makatambong si Buendia apan wala gihapon kini motunga.

Gikuwestiyon usab ni Saceda ang giingong “confidential” nga rason nga gihatag ni Buendia kung nganong wala kini makatambong sa maong meeting nga alang kaniya supak sa prinsipyo sa transparency ug accountability sa serbisyo publiko.

Lakip sa mga seryosong reklamo nga gipadayag ni Saceda mao ang kapakyasan sa pagpahigayon sa duha ka mandatory Katipunan ng Kabataan (KK) Assembly niadtong 2025, ang giingong wala pagpatim-aw ni Buendia sa mga sesyon gikan Enero hangtod Marso nga walay klarong rason, ug ang kakuwang sa maayong konsultasyon ug plano alang sa Comprehensive Barangay Youth Development Plan (CBYDP) ug Annual Barangay Youth Investment Program (ABYIP).

Giingon sab ni Saceda nga dili kini gagmay nga mga sayop kondili mga batakang obligasyon nga gikinahanglan sa balaod ug sa Internal Rules and Procedures (IRP) sa SKF kung diin iyang gikutlo ang Article XVIII, Section 3 sa SKF IRP nga naghisgot nga ang abandonment of duty usa ka seryosong paglapas alang sa mga opisyal nga padayon nga napakyas sa pagtuman sa katungdanan.

“What is the purpose of the SKF IRP if it will not even be enforced in situations where violations are already obvious? Is the IRP merely for display? Is it only written on paper but asleep in practice?” pangutana pa ni Saceda.

Nagpasidaan usab si Saceda nga ang padayong kahilom ug kakuwang sa aksyon molungtad sa pagbalewala sa mga dili maayong pagpanerbisyo.

Gisaysay sab ni Saceda nga adunay pipila ka SK chairperson nga nipadayag na sab sa ilang kabalaka online nga ang kontrobersiya sa SK Labangon mahimong makadaot sa reputasyon sa ubang opisyales sa SK nga nagtinarong sa ilang mga katungdanan. 

“They are correct to worry. One negligent leader can damage public trust in the entire institution. And that is precisely why your leadership at this moment matters,” suma pa ni Saceda.

Gihagit ni Saceda si Jakosalem nga magpahigayon dayon og pormal nga imbestigasyon batok sa tibuok konseho sa SK Labangon ug susihon ang giingong kapakyasan ni Buendia isip chairman ug magpatuman og silot kung mapamatud-an ang mga paglapas.

Sa pagsuwat ning balita, wala pay gipagawas og tubag si Jakosalem ug ang SK Labangon kabahin sa mga alegasyon nga gipadayag sa social media post. IBM BANAT NEWS