Missing ambulansiya, gipangita

CEBU, Philippines — Ambulansiya nga gi-isyu sa Barangay Apas sa Cebu City gikatahong na-missing sulod na sa pipila ka tuig.

Tungod ani, nagpagawas og demand letter ang Cebu City Department of General Services (DGS) ngadto sa Barangay Apas niadtong Marso 25, 2026, human madiskubre nga usa ka unit sa ambulansya sa barangay ang gi-deklarang “not found” sa bag-ong inventory count sa ilang mga property, plant, and equipment (PPE).

Base sa suwat nga gipirmahan ni DGS OIC Head June Maratas, gimandoan ang Barangay Kapitan nga si Virgil A. Cabigon nga ipakita ang sa usa ka Toyota Hi-Ace Commuter Van Ambulance nga nakalista ubos sa responsibilidad sa barangay pinaagi sa Property Acknowledgment Receipt.

Gipahinumduman usab sa direktiba ang pagsunod sa COA Circular 2020-006 nga nagmando sa hugot nga dokumentasyon ug pisikal nga imbentaryo sa tanang government assets.

Gipahibalo usab sa DGS ang kanhi barangay kapitan nga s Ramil Ayuman pinaagi sa laing sulat kun diin gihangyo kini nga mohatag og beripikasyon sa kahimtang sa ambulansya nga adunay plate number SKN 554.

Sa ilang imbestigasyon, gikatahong ang maong unit gihatod ngadto sa usa ka Toyota service center alang sa repair o maintenance, apan walay pormal nga dokumento o koordinasyon nga gisumitir sa opisina sa DGS.

Matud pa sa DGS, wala gyud sila pahibaw-a sa bisan unsang pagbalhin o status sa maong ambulansya, hinungdan nga giisip kini nga accounting discrepancy ug subject sa official demand.

Si Ayuman nitubag sa maong suwat ug mipahibalo nga ang maong sakyanan giingon nga nalambigit sa usa ka aksidente niadtong 2020 nga miresulta sa kamatayon sa usa ka security guard.

Human niini, giingong gidala ang ambulansya sa Toyota Talisay alang sa repair, apan hangtod karon wala pa kini mabalik sa barangay ug nagpabiling wala sab kini kasayuran sa tinuod nga kahimtang niini.

Matud pang Ayuman, ang ambulansya usa ka importanteng gamit sa emergency response sa Barangay Apas ug gi-awhag ang DGS sa pagtabang aron makit-an kini og balik.

Apan si Cabigon miingon nga ang maong ambulansya wala nawala ug nagpabilin sa usa ka pribadong service center nga nahimutang sa Dakbayan sa Mandaue tungod kay adunay dakong guba sa atubangan nga bahin.

Giangkon ni Cabigon nga ang ambulansya wala pa nila ni makuha tungod sa kondisyon ug sa kalisod sa pinansyal sa barangay. — /IBM (BANAT NEWS)