Bomb Threat sa Talisay

CEBU, Philippines — Napugos sa paghunong sa mga ginbuhaton ug mga transaksyon para sa publiko ang Talisay  City Hall kagahapon human sa nadawat nga hulga sa bomba kagahapon, Abril 28.

Sumala pa sa Facebook post ni Talisay Mayor Gerard Anthony “Samsam” Gullas sa iyang official FB page, ang hulga nadawat niya pinaagi sa usa ka mensahe.

Kini nag-ingon nga adunay eksplosibo nga gitanom sulod sa City Hall, nga nakapahadlok ug nakaapekto sa operasyon sa mga kawani ug sa mga tawong dunay tuyo sa city hall.

Daling niresponde ang mga sakop s Talisay City Police Station  uban sa ilang Special Weapons and Tactics (SWAT) aron inspeksyonon ang tibuok City Hall ug masiguro ang kaluwasan sa tanan. Sumala sa post sa mayor, ang account nga nagpadala sa mensahe murag peke, apan bisan pa ani dili gayud pwedeng pasagdan ang bisan unsang hulga nga posibleng makapeligro sa kinabuhi sa katawhan.

“I sincerely apologize to our summer workshop students, taxpayers, employees, and all individuals whose transactions and activities were affected today,” matud ni Gullas sa maong post. Ang iyang pasidaan batok sa mga tawong walay lingaw o kadtong motisok og kasamok ug kahadlok pinaagi aning mga pekeng bomb threat o bomb joke nga usa kini ka seryosong salaod ubos sa Presidential Decree No. 1727 o Anti-Bomb Joke Law sa Pilipinas.

Duna kini silot nga pagkabilanggo, multa, o parehong ipahamtang niadtong mapamatud-ang nagbuhat niini.

Agi og panagana, gipahunong ang tibuok adlaw nga operasyon sa mga buhatan sa City Hall apil ang summer clinic activities.

“We ask for everyone's understanding and cooperation. Please remain vigilant, stay calm, and keep safe,” dugang pa sa mayor.

Human sa gihimong inspeksyon sa kapolisan, walay nakita nga bomba sa edipisyo sa Talisay City Hall.

Pipila ka bulan na ang nilabay sa dihang nahunong sab ang operasyon sa maong city hall tungod gihapon sa bomb threat, hangtud karon wala pay napasakaan og kaso bahin adto.— Sheila Mae Agrabio IBM BANAT NEWS