Transport group nangayo og tabang nga mapadali  ang ayuda  

CEBU, Philippines — Nakigdiyalogo ang mga miyembro sa National Confederation of Transport Union(NCTU)-Cebu sa direktor sa Land Transportation Franchising and Regulatory Board-7 Abosamen Matuan kagahapon sa buntag.

Ang NCTU-Cebu nipahigayon kini og rally diha sa atubangan sa opisina sa LTFRB-7 kuyog ang mga sectorial groups nga nagsuporta kanila sa pakigbisog karon batok sa pagsige og saka sa presyo sa produktong petrolyo.

Nisalmot usab sa maong kalihokan ang mga traditional ug modernized PUJ, TNVS, delivery riders ug mga ride hailing app.

Gipasulod ang ilang mga lider sa conference room sa LTFRB-7 ug giatubang ug gipamati nila ni Matuan ang ilahang mga yango-ngo.

Gihangyo sa grupo nga matabangan nga mapadali ang pag-release sa ayuda nga anaa sa Department of Social Welfare and Development ug ang paglibkas sa excise tax.

Gipasalig sa LTFRB-7 nga ipaabot sa ilahang ulohang buhatan ang mga sentimento sa grupo sa transportasyon.

Samtang nipasalig ang grupo nga dili mosalmot sa transport holiday diin gihangop kini sa LTFRB-7 aron dili mabalda ang mga sumasakay.

Gibutyag sa NCTU nga anaa man o walay transport holiday adunay napulo nila ka mga miyembro ang nihunong pagbiyahe tungod kay wala makasugakod sa kamahal sa lana ug posibleng madugangan pa kini kun dili mohunong ang pagtaas sa presyo sa petroleum products.

Sa laing bahin, gihatagan og pagtagad sa konseho sa Dakbayan sa Mandaue ang reklamo sa mga pasahero batok sa mga habal-habal nga nagkalain-lain nga kantidad ang gipaningil nga pletehan niini.

Si Konseha Dante Borbajo, sa iyang resolusyon nga giduso atol sa regular session sa konseho sa siyudad kagahapon iyang gipadayag nga ang molupyo sa bukirang barangay sa siyudad nga walay biyahe ang tricycle o mga PUJ nga pasaheroan ang nipadangat og reklamo ngadto kaniya

Matud ni Borbajo nga naglakip niini ang Canduman, Cubacub, Tawason ug Casili nga tungod sa pag-usbaw sa presyo sa gasolina ilang namatikdan nga nipausbaw usab ang mga habal-habal driver sa pletehan.

Gibutyag ni Borbajo nga kaniadto anaa lang sa P20 ang pletehan sa mga habal-habal sa maong mga lugar apan karo nagkalain-lain na adunay P30, P35 ngadto sa P45.

Si Borbajo nagkanayon nga dili supak ang mga  pasahero sa ilang pagpausbaw sa pletehan apan ang ilang gireklamo ang nagkalain-lain nga kantidad nga mahimo na hinuong hinungdan sa  panaglalis.

Sa iyang resolusyon, si Borbajo niawhag sa mga barangay kapitan nga mopatawag kini og tigom sa mga nagkalain-laing organisasyon sa habal-habal ug ilang sabotan ang hiniusang kantidad nga usbaw sa pletehan aron kalikayan na ang panaglali. (BANAT NEWS)