Tulo ka gipasanginlang kawatan nangadakpan

CEBU, Philippines — Nadakpan ang usa ka giingong notadong kawatan sa mga sakop sa kapulisan sa Mabolo Police Station 4 Cebu City Police Office (CCPO) human nisulod og balay sa Brookside Valley, Barangay Lahug, Cebu City sa miaging adlaw.

Ang suspetsado mao si alyas John, 30, residente sa naasoy nga dapit samtang reklamante usa ka 27 anyos nga lalakeng molupyo sa maong lugar.

Sumala pa sa Mabolo Police Station 4 ang suspetsadonotadong kawatan sa lugar ug anang higayona nisaka kini sa balay sa biktima diha agi sa bintana.

Gisakiyo sa suspetsado ang Iphone 13 Pro max 256 GB blue in color nga tag P35,000, usa ka Samsung Phone black in color nga tag P5,000 ug nga P5,000.

Pag review sa CCTV footage nailhan ang suspek ug duna pa gyud silay silingang polis maong nadakpan kini dayun.

Apan bisan og nakita na siya sa CCTV kusganon gihapon siyang nihimakak sa pasangil. Wala na sab mabawi pa ang mga butang nga gikawat sa suspetsado.

Samtang nabun-og ang usa ka 18-anyos nga lalake human gikulata sa mga tawo kay nisulod matud pa og balay nga dili ilaha sa Sitio Lower Manol, Barangay Tisa, Cebu City sa miaging adlaw.

Ang suspetsado mao si alyas Lito taga Sitio Kamungay, Barangay Candulawan, Talisay City.

Sa impormasyon sa Labangon Police Station 10 nga nisulod ang suspetsado sa balay biktima nga daw wala sa kaugalingon, maong nagpatabang ang reklamante sa mga silingan hinungdan nga kini nakulatahan.

Samtang giposasan ang 31 anyos nga lalaki human siya nasakpan nga miunay og kawat sa igtatari nga manok sa iyang silingan diha sa Purok Letuce, Barangay Poblacion, Dakbayan sa Talisay niadtong Lunes sa hapon.

Ang dinakpan mao si alyas Eterson, 31. Ang tag-iya sa manok mao si alyas Rogelio Sestoso, 64. Matud pa gipunit sa suspek ang manok sa biktima nga gilansad diha sa atubangan sa panimay niini apan dunay nakakita sa iyang gibuhat.

Ang biktima nagpatabang sa otoridad hangtud nga nasikop ang suspek diha sa ilang pinuy-anan ug narekuber ang gikawat nga manok. — /IBM (BANAT NEWS)