Namaligya’g Agarwood seedlings gidakop   

CEBU, Philippines — Gidakop sa mga operatiba sa National Bureau of Investigation (NBI) uban sa pakigtambayayong sa Department of Environment and Natural Resources (DENR) ang usa ka babaye atol sa entrapment operation tungod sa  matud ilegal nga pagbaligya og mga seedlings nga  Lapnisan nga kahoy o mas naila nga Agarwood diha sa lungsod sa San Fernando.

Ang operasyon gihimo sa mga ahente sa NBI Cebu District Office ug sa NBI Central Visayas Regional Office nunot sa gipakusog nga kampanya batok sa  mga krimen sa kinaiyahan.

Sumala pa sa NBI, nadakpan gyud sa akto ang suspek nga si  Jocelyn Dacanay Polleros, molupyo sa Purok 5, Barangay Sangat, San Fernando, Cebu  nga namaligya ug nananom og  Lapnisan nga walay permit o authorization gikan sa DENR.

Si Polleros sa interbyu sa media miangkon nga namaligya siya og mga seedlings sa Agarwood sukad pa niadtong 2019 apan wala siyay permiso gikan sa gobiyerno.

Nakuha gikan sa iyang possession ang 48 ka crates nga adunay gibana-bana nga 1,000 ka mga Agarwood seedlings nga adunay gibanabana nga market value nga P300,000.

Ang Agarwood o Aquilaria malaccensis (gitawag usab nga Aquilaria cumingiana) gikonsiderar na nga ‘endangered tree” tungod sa sobrang pag-ani ug ilegal nga pagpamaligya niini.

Ang resin niini o duga giilogan sa mga mamuhatay og mga mahalong perfumes o pahamot dili lang diri sa nasud kondili apil na didto sa abroad ilabi na sa Middle East.

Matud pa nga moabot og $100,000 (gibana-bana nga P5 milyones) ang kada kilo depende sa kalidad ug grado sa duga niini.

Ubos sa Republic Act No. 9147 o Wildlife Resources Conservation and Protection Act, ang dili awtorisado nga pagkolekta, pagpanag-iya, pagdala, ug pagpamaligya sa mga wildlife species adunay silot gikan sa unom hangtod 12 ka tuig nga pagkabilanggo ug multa gikan sa P100,000 hangtud P1,000,000.

Tungod sa nagkadako nga hulga sa pagkapuo sa Lapnisan, ang gobiyerno sa Pilipinas hugot nga nag-regulate sa pagbaligya, pagdala, pagtanom, ug pag-export niini. Naapil kining kahoya sa listahan sa hapit na mapuong kahoy ubos sa International Union for Conservation of Nature (IUCN). Si Polleros  pasakaan og kasong paglapas sa Sections (e) ug (f) sa Republic Act No. 9147 sa Provincial Prosecution Office. (BANAT NEWS)