Mga durugista sikop sa buy-bust
CEBU, Philippines — Nadakpan atol sa buy-bust operation sa mga operatiba sa PDEA Lapu-Lapu City Team ug Lapu-Lapu City Police Office Station 3 ang lima ka indibidwal diha sa Purok Acacia, Barangay Poblacion, Lapu-Lapu City niadtong Sabado sa gabii. Si PDEA-7 Director Joel Plaza niila sa nadakpan nga subject sa operasyon ug drug den maintainer nga si alyas “Manoy Bords”, 64-anyos, panday, nagpuyo sa naasoy nga dapit.
Apil usab sa nadakpan ang upat ka tigbisitahan sa drug den nga sila si alyas “Makma”, 29-anyos, construction painter, taga Poblacion, Lapu-Lapu City; alias “Vinsoy”, 31, parking boy, nagpuyo sa Basak, Lapu-Lapu City; alias “Rence”, 18, ug alias “Kyle”, 20, pulos parking boys parehong taga Marigondon, Lapu-Lapu City.
Nasakmit atol sa operasyon ang walo ka putos nga shabu nga nitimbang og unom ka gramo ug gibana-banang nibalor ngadto sa P40,800, buy-bust money ug nagkalain-laing drug paraphernalia.
Ang otoridad nakadawat og taho gikan sa concerned citizens kabain sa ilegal nga kalihokan sa suspetsado.
Gikataho nga ang suspetsado maka-dispose og 10 ka gramo’ng shabu kada semana.
Sa laing bahin, nasikop ang usa ka high value individual (HVI) sa pagpamaligya og ginadiling drugas diha sa sitio Rattan, Barangay Tanke, Dakbayan sa Talisay niadtong Biyernes sa gabii.
Ang suspetsado mao si alyas “Hudas”, 45, usa ka pintor, taga Sitio Tunga, Barangay Tanke sa nahisgutang siyudad.
Nakuha gikan kang Hudas ang shabu nga nitimbang og 5.25 gramo nga nibalor ngadto sa P35,700. — /BDB (BANAT NEWS)
- Latest
