P1.1M shabu nasakmit   

CEBU, Philippines — Nasakmit sa kapolisan sa Balamban Municipal Police Station ang mokabat sa P1. 53 milyon gituohang shabu ug armas gikan duha ka High Value Individual (HVI) sa buy bust operation sa Barangay Buanoy sa maong lungsod.

Si Police Lieutenant Colonel Ruel Burlat, Acting Chief of Police (ACOP) miila sa duha nga mao sila si alyas JP, 27,  ug  alyas Noel, 28, pulos nagpuyo sa maong dapit.

Matud pa ni Burlat ang buy bust operation ilang gilusad sa miaging Miyerkules sa kaadlawon human sila nakadawat og impormasyon labot sa ilegal nga kalihokan sa duha sa nahisgutang lugar.

Nasakmit gikan nila ang  lima ka mga sachet ug siyam  ka  medium size sa gituohang shabu nga nitimbang og 225.54 gramo nga ang tanan nagkantidad og P1,553,672.00  base sa Standard Drug Price (SDP) value niini. Lakip sa nasakmit ang armas ang walay lisensiya nga kalibre .45 nga adunay magazine ug mga bala niini.

Dugang nasakmit sa kapolisan ang P500 nga buy bust money nga gigamit sa sa pagpalit og shabu sa mga polis.

Gitanggong karon sa detention cell sa kapolisan ang duha ug gikatakdang pasakaan og mga kasong kalapasan sa Section 5 ug Section 11 ubos sa Article 2 sa Republic Act 9165 ug RA 10591 o Comprehensive Fire Arm and Ammunition Regulation Act.

Samtang nasikop sa mga operatiba sa Provincial Intelligence Unit/Provincial Drug Enforcement Unit ug Naga City Police Station sa Cebu Police Provincial Office lain pud nga HVI sa ilahang buy-bust operation sa Barangay Tina-an, dakbayan sa Naga niadtong Miyerkules sa gabii, Pebrero 11, 2026.

Ang nadakpan mao si Louise Earl Ang Miranda alyas Didot, ex-convict, 23, taga Sitio Seaside Fatima, Barangay Tina-an, Dakbayan sa Naga.

Nasakmit sa mga operatiba ang 15 gramos sa gituohang shabu nga nagkantidad og P102,000 ug usa ka kalibre .45 nga armas, magazine nga dunay tulo ka bala.  Kasong kalapasan sa Republic Act 9165 ug Republic Act 10591 ang ipasaka batok sa suspetsado. (BANAT NEWS)