Nagselos, mabdos nga kapuyo gikulata

CEBU, Philippines — Gibalhog sa prisohan ang usa ka lalake human niini gikatahong gikulata ang iyang mabdos nga kapuyo diha sa Purok 2, Sambag, Landing, Catarman, Lungsod sa Liloan niadtong Lunes, Pebrero 2, 2026.

Ang biktima mao si alyas Anne, 24 anyos, taga Purok 2, Sambag, Catarman, Liloan samtang ang suspect mao si alyas Ching, 27 anyos, residente sa naasoy nga dapit ug kaipon sa biktima.

Sa imbestigasyon sa Liloan Municipal Police Station ang biktima kay duha ka buwan nga mabdos.

Personal kining nipatim-aw sa police station ug ni report nga gikulata siya sa iyahang kaipon. 

Sigon pa sa biktima ngadto sa kapulisan nasukod kaniya ang suspek sa diang iyaha kining gipapauli sa ilaha aron magkuha og ilisan kay  motrabaho naman kini.

Apan gikatahong nasuko matod pa ang suspetsado ug gibitad ang buhok sa biktima hinungdan nga natumba kini sa karsada.

Wala pa gyud kini matagbaw, gikatahong gilabay kini og mga butang nga naa sulod sa plastic bag ug gihapos sab ang ilang gadget nga tablet sa yuta.

Nisuway pa ang biktima og pugong sa suspek apan gisumbag na hinoon siya sa ulo ug giguyod.

 Tungod niini, ang biktima nakaangol ug nireklamo nga nagsakit ang iyahang tiyan.

Nasuta matud pa nga hubog ang suspek sa dihang iya kining gihimo ug matud pa nagselos kini.

Mialegar ang biktima nga kulatado siya sa iyahang kaipon sulod sa tulo ka tuig, ug ang ilang anak nag-antos tungod sa kinaiya niini. IBM  BANAT NEWS