Driver education, tutokan

CEBU, Philippines — Bag-ong officer in charge sa Land Transportation Office-7 motutok sa estriktong pagtuman sa mga motorista sa mga lagda sa trapiko pinaagi sa paghigpit sa road safety ug driver education sa Central Visayas.Nagtuo si Ranches nga anhi kining tanan magsugod pinaagi sa seryosong pagsunod sa mga proseso sa pagkuha palang og driver’s license.

Buot niya nga kining driver’s license examinations hatagan og pagtagad aron siguradong kwalipikado lamang nga aplikante ang mahatagan og lisensiya ug dili lang si bisan kinsa.

Matud pa niya, ang mga nag-unang traffic violations sa rehiyon, mao ang pagmaneho nga adunay defective devices o unauthorized accessories, wala paggamit sa seatbelt, reckless driving, ug wala suot nga helmet.  Apan nagtuo siya nga pinaagi sa estriktong law enforcement ug kolaborasyon sa local government units (LGUs), Philippine National Police (PNP), Highway Patrol Group (HPG), ug non-government organizations (NGOs), mahimong  luwas ang kalsada para sa mga motorista ug pedestrian.

Gipahibalo sab ni Ranches nga palapdan pa nila ang Free Theoretical Driving Course (FTDC) sa rehiyon.  Ang TDC usa sa mga rekisitos kauban sa aktwal nga pagkuha og driving lesson ug pagpasar niini, aron ang usa ka aplikante mahatagan og lisensiya.

Dili tanang Pilipino dunay katungod makabaton og driver’s license tungod kay usa lamang kini ka prebilihiyo nga gihatag sa gobiyerno, mao nga kadtong malapason kanunay sa mga lagda sa trapiko ug nahimo ng peligro para sa uban, mahimo silang bawian og lisensiya ug tibuok kinabuhi ng dili hatagan sa maong prebilihiyo. Sa pikas bahin, gipasalig niya nga panigurohon niya ang integridad sa mga empleyado sa LTO pinaagi sa pagpahigayon og integrity development seminars, giya sa prinsipyo nga “matino at maginoo.”

Pinaagi aning tanang iyang mga giplanong buhaton, nagtuo si Ranches nga mas luwas ug mas disiplinado ang mga motoristang mogamit sa mga kalsada sa Central Visayas.

Deputation sa Polis

Sa laing bahin, tungod sa sagunson nga mga aksidente sa kadalanan nga naglambigit sa mga sakyanan, trak ug motor, giawhag sa Provincial Director sa Cebu Police Provincial Office(CPPO) Colonel Abubakar Udang Mangelen Jr. ang mga motorista nga magbinantayon sa ilahang pagmaneho.  "Sa atinAron mamenusan ang disgrasya sa kadalanan nagplano ang CPPO nga makig-alayon sa Land Transportation Office(LTO) nga mabansay ang mga polis sa Probinsiya sa Sugbo aron ma-deputize sa ahensiya.

Gamiton sila aron motabang sa pagpatuman sa mga balaod sa trapiko.

Tinguha sab ni Mangelen nga magpatabang sa kagamhanan sa Probinsiya sa Sugbo nga makapalit sila breath analyzer. Gamiton kini para pagsusi sa mga drayber nga malambigit sa aksidente kun nakainom ba sila o hubog nga nagmaneho.  Dako matod pa og tabang ang breath analyzer sa pagpasaka og kaso batok sa nalambigit sa disgrasya ilabi na kun dunay kinabuhi nga makalas. IBM BANAT NEWS