Mayor gi-RPG, mga gunmen patay

CEBU, Philippines — Sakyanan nga giluwanan sa Mayor sa Shariff Aguak sa Maguindanao del Sur gitirahan og rocket propelled grenade (RPG) , apan ang tulo ka mga gunmen wala nakaipsot tungod kay napatay sab sila dayun sa mga sundalo ug mga polis nga niresponde.

Naangol sa maong ambush si Mayor Akmad Ampatuan Sr. ug duha niya ka mga bodyguards sa dihang padung sila moliko patuo sa usa ka dalan sa Shariff Aguak kalit silang gitirahan og RPG sa mga lalaking sakay og abuhon nga minivan nga nag-parking duol sa eskina.

Ang maong insidente nakuhaan tanan og video sa CCTV sa lugar. Usa sa video nagpakita sa usa ka lalaking nanaog sa minivan ug nitira og RPG. Ang ikaduhang video nagpakita sab RPG nga miigo sa Toyota Land Cruiser SUV sa mayor, apan bisan sa pagkaigo niini nakapabulhot gihapon kini og padagan.

Ang mga naangol mao silang Private 1st Class Manuel Arcega Dondiego nga sakop sa 90th Infantry Battalion ug ang Maguindanaon nga si Lakman Eso Tips nga mga escorts sa mayor.

Dali silang gidala sa Bangsamoro Regional Hospital dili layo sa nahitaboan.

Sumala pa sa mga opisyales sa Shariff Aguak Municipal Peace and Order Council uban sa mga opisyales sa kapolisan sa Maguindanao del Sur mitbuyag sa mga reporters nga pagka-hapon sa samang adlaw (kagahapon adlaw nga Domingo) naapsan ang nga suspek sa mga nigukod nga otoridad diha sa Barangay Meta sa kasikbit nga lungsod sa Datu Unsay.

Apan imbes nga motahan gikatahong nakigpinusilay ang mga suspek hinungdan nga sila napatay.

Ang tulo giila nga silang Budtong Alim Pendatun, Tekz Malid Pendatun ug Puasa Oting Madid. Wala pay impormasyong gihatag ang kapolisan kun unsay motibo sa tulo.

Sumala pa sa mga opisyales sa lungsod ug mga traditional Moro community leaders nga ang target sa tulo mao gyud ang mayor.

Usa ka dekada na ang nakalabay sa dihang naangol sab ang mayor samtang nagbiyahe sa Cotabato-Isulan Highway padulong sa Cotabato City gikan Shariff Aguak. — /IBM (BANAT NEWS)