16 ka pamilya nag Pasko sa modular homes

CEBU, Philippines — Hingpit gyud nga nagsaulog sa Pasko ang 16 ka pamilya nga biktima sa Bagyong Tino sa Siyudad sa Mandaue gikan sa evacuation center ngadto na sa bag-o nilang pinuy-an nga mga Modular Homes sa Bayanihan Village sa Barangay Guizo human sa gipahigayong pagbalhin kanila niadtong Disyembre 23, 2025.

Si Mayor Thadeo Jovito “Jonkie” Ouano nga nahinabi sa mga tigbalita miingon nga ang maong 16 ka pamilya nga gikan sa evacuation centers sa Barangay Alang-Alang ug Barangay Umapad maoy unang batch sa mga pamilya nga gianod ang ilang mga panimalay atol sa pag-igo sa Bagyong Tino dinhi sa Sugbo niadtong Disyembre 4, 2025.

Dugang pa niya nga isunod usab unya niini sa sunod semana ang mga pamilya sa Barangay Tingub nga kasamtangan karon nga gipahimutang sa evacuation center sa Tingub Elementary School.

Gipaningkamutan sa kagamhanan sa siyudad nga mahingpit ang pagbalhin sa maong mga pamilya diha Bayanihan Village.

Kompleto sa tubig, kuryente, lung-aganan, comfort room ug kaligoanan sa matag pamlya nga mopuyo niini.

Sa nasayran ang Department of Human Settlement and Urban Development (DHSUD) maoy nagdonar sa maong mga prefabricated Modular Homes.

Kini diha gipahimutang sa tapad nga luna sa Pasilong Center sa Barangay Guizo sa Siyudad sa Mandaue.

Si DHSUD Undersecretary Johnson Domingo maog nangulo sa gipahigayon nga ceremonial turnover ceremony sa 50 ka mga Modular Homes niadtong Disyembre 19, 2025.

Matud pa ni Domingo nga ang 50 ka mga modular homes nga gitukod maoy kabahin lamang sa 200 ka mga modular homes nga ilang tukoron sa Siyudad sa Mandaue nga maoy kapuy-an sa mga biktima sa Bagyong Tino.

Gawas sa Mandaue City, duna say susamang mga Modular Homes para sa mga apektado gikan sa Siyudad sa Talisay, Lungsod sa Compostela ug Liloan. — /IBM (BANAT NEWS)