Sunog sa Pardo ug Sambag 2

CEBU, Philippines — Miulbo ang usa ka sunog sa Sitio Kauswagan, Barangay Basak Pardo, siyudad sa Sugbo kagahapon sa buntag, Lunes, Desyembre 22, 2025.

Ang sunog giisa sa first alarm alas 10:48 sa buntag ug base sa talaan sa Department of Social Welfare and Services dili mominos sa 16 ka panimalay; 22 ka pamilya o 91 ka individuals ang apektado sa maong sunog.

Niabot sa P408,000 ang danyos sa sunog nga nagsugod matod pa sa panimalay ni Ali Unda.

Alas 11:30 sa buntag gideklarar nga fire under control ang sunog ug pagka alas 11:55 hingpit kining na fire out.

Padayon ang imbestigasyon sa kabomberohan sa hinungdan sa sunog.

Sa laing bahin, padayun pa ang kabomberohan sa ilang imbestigasyon sa nahitabong sunog diha sa Sitio Esmara, Barangay Sambag 2 ning Dakbayan sa Sugbo niadtong adlaw nga Sabado.

Ang tag-iya sa balay diin magsugod ang sunog nga si Emelyn Buenavista  nagtuong electrical ang hinungdan niini.

Nagtuo siyang linya sa kuryente gikan sa poste ang sinugdanan niini apan wala pay kumpirmasyon gikan sa kabomberohan ang iyang pagduda.

Sa pagkakaron, gipahiluna silang mga nasunogan diha sa bakanteng luna gawas sa kapilya.

Cebu City Fire Office nakatala og 13 ka mga sunog sa Cebu City sulod ning bulan sa Disyembre.

Si Regional Director sa BFP-7 Fred Trajeras Jr. nanawagan sa publiko nga mag-amping kanunay aron makalikay sa sunog ilabi na niining Pasko ug pagsugat sa Bag-ong Tuig.

Ang DSWS padayon pang nihimo sa ilang assessment aron sa paghatag og dinalian nga panginahanglanon sa mga nasunogan.