Water catchment ilakip sa rekisitos sa business permit

CEBU, Philippines —  Giawhag sa Sangguniang Panlalawigan ang mga local government units sa probinsya nga iapil ang pagbutang og water catchment facility sa mga rekisitos sa pagkuha og business permit sa mga establisamento.

Usa ka resolusyon ang gipasar sa hunta probinsyal kalabot niini nga gipangamahanan ni bokal Dason Larenz Lagon, diin gilatid ang pag-require sa mga establisamento sa pag-install sa water catchment facility nga makatabang sa pagmenus sa risgo sa baha.

Kini maoy usa ka paagi aron makapundo og tubig ulan, nga makatabang nga dili mapuno ang mga drainage system.

"This is expected to reduce property damage and disruptions caused by flooding in both commercial and residential areas" matod sa provincial board.

Ang maong water catchment facility makatabang sab nga momenus ang bayranan sa tubig ug makatabang panahon sa kalamidad ug magnihit og tubig.

Laing resolusyon ang giduso ni Lagon nga nag-awhag sa mga LGUs nga mopahigayon og inspeksyon ug mopatuman og rehabilitasyon ug restoration sa kasamtangang deep wells o atabay ug ubang tinubdan sa tubig nga naguba sa 6.9 magnitude nga linog niadtong Septiyembre 30, 2025.

Ang duha ka resolusyon gipasar sa provincial board atol sa regular session niini niadtong Disyembre 15, 2025.