Presyo sa mga pabuto niumento

CEBU, Philippines — Ang mga manindahay og pabuto nipausbaw sa presyo sa ilang gibaligya nga mga pabuto dih sa Barangay Babag, Dakbaya sa Lapu-Lapu.

Ang manindahay og mga pabuto nga si Remedios Tan ug ang iyang anak nga si Bella ilang gipasabot nga kinahanglan silang mopausbaw sa ilang presyo sa pabuto tungod sa pagsaka sa presyo sa chemicals nga isagol sa paggama og pabuto ug ang pagsaka sa abang sa lugar nga ilang gitukoran sa temporaryo nga stall.

Matud sa inahan ug anak nga ang presyo sa ilang pabuto nga kaniadto tag P100 giumentohan nila ngadto sa P120 ug ang tag P5 kaniadto tag P6 o P7 na ang presyo samtang ang abang nila sa pwesto gikan sa P15,000 nisaka ngadto sa P20,000.

Nanghinaot sila nga padayong mamalit sa ilang pabuto ang ilang mga suki bisan sa mga katalagman nga niigo sa Sugbo aron makabawi sa ilang puhonan.

Gibutyag ni Remedios nga lakip sa sayong namalit og pabuto mao ang naapektohan sa linog ug bagyo sa amihanang Sugbo diin ang ilang pagpalit og pabuto isip pasalamat nga walay kinabuhi nga nakalas sa ilang pamilya bisan apektado sa linog ug bagyo.

Subay sa records sa city hall, niabot ngadto sa 82 ka namaligya og pabuto ang nakalukat og permit nga maoy gitugotan nga makabaligya.

Nasayran nga gipahigayon ang joint inspection sa Lapu-Lapu City Police Office, Regional Police Office-7 ug sa Bureau of Fire Protection Lapu-Lapu City Fire District ngadto sa mga namaligya og pabuto.

Si Colonel Antonieto Cañete, officer-in-charge sa LCPO ug Fire Superintendent Arnel Abella, hepe sa Lapu-Lapu City Fire District nipasalig nga kanunay’ng balik-balikan sa pag-monitor sa ilang mga sakop ang mga mamaligya sa pabuto aron pagsiguro nga nagsunod sa gilatid nga mga lagda  sama sa pagdili sa mga pabuto sobra ka kusog nga mobusikad, pagpundo og tubig ug fire extinguishers.

Ang mga mamaligya og pabuto duol sa utlanan sa siyudad ug Lungsod sa Cordova gipahimutang sa usa ka lugar diha sa Sitio Takan apan duna gihapon’ypipila nga namaligya daplin sa karsada gikan sa Babag hangtud sa Barangay Canjulao ug tipik nga bahin sa Barangay Gun-ob sa maong siyudad.