Abogado sa BIR gi-ambush

CEBU, Philippines — Patay ang usa ka abogado nga Certified Public Accountant (CPA) lawyer sa Bureau of Internal Revenue (BIR) examiner sa pagpang-ambush sa riding in tandem  diha sa Purok 8, Sacris Road sa Barangay Bakilid, Siyudad sa Mandaue alas 5:50 ang takna sa Huwebes sa buntag, Disyembre 1, 2025.

Si Police Lieutenant Colonel Mercy Villaro,tigpamaba sa Mandaue City Police Office (MCPO) miila sa biktima nga mao si Atty. Duke Ramil Perral Lincuna nga taga Barangay Lamac sa Lungsod sa Consolacion.

Matud pa pa ni Villaro nga mga large scale properties ug mga nagkadaiyang negosyo ang gihuptan niini isip examiner sa BIR.

Base sa imbestigasyon nagmaneho ang biktima sa iyang SUV gikan pa sa ilang panimalay padung kini sa iyang buhatan sa BIR sa dihang pag-abot sa nahitaboan gipaulanan kini og bala.

Gituohan sa mga imbestigador nga gisundan kini sa wala hiilhing mga lalaki ug sa pagsulod sa Sacris Road sa Barangay Bakilid sa dili pa kini mogawas padung sa dalan A.S. Fortuna.

Ang mga mamumuno duh aka lalaking sakay og motorsiklo nga paspas sab nga nibiya sa lugar.

Gdala sa emergency medical service ang biktima sa Mandaue City Hospital apan nakabsan kini sa iyang gininhawa.

Nakuha sa crime scene ang 11 ka mga basiyo sa bala gikan sa wala  pa matino nga kalibre nga armas.

Gisusi pa sa MCPO ang mga footages sa CCTV camera duol sa crime scene alang sa pag-ila sa mga mamumuno sa biktima.

Sa pikas bahin,  gikondena sa Integrated Bar of the Philippines (IBP) Cebu City Chapter ug IBP Cebu Chapter ang gihulagway nilang brutal ug walay kalooy nga pagpatay ni Lincuna.

Si Lincuna usa ka respetadong abogado ug revenue officer sa Bureau of Internal Revenue (BIR) Large Taxpayers Division.

 “This is not merely an assault on one lawyer but an attack on the justice system, public service, and the rule of law itself,” matud pa sa IBP- Cebu Chapter.

Naalarma ang organisasyon aning padayun nga pagsaka sa mga krimen ilabi na niadtong mga indibidwal nga igo lamang nagbuhat sa ilang trabaho.

“We reaffirm our commitment to defend the legal profession, ensure the safety of our members, and uphold the rule of law with vigilance and resolve. Violence against lawyers is violence against justice itself, and it will not be met with silence,” dugang pa sa pamahayag.

Giawhag nila ang mga otoridad pagbuhat og hugot ug tukma nga imbestigasyon para mahatagan og hustisya si Lincuna.- Mitchelle L. Palaubsanon ug Rowena Capistrano. IBM BANAT NEWS