Mga regular, casual ug J.O. makadawat og bonus
CEBU, Philippines — Makadawat ang mga regular ug casual nga mga empleyado sa Kagamhanan sa Dakbayan sa Sugbo og P15,000 pesos isip Christmas Bonus.
Samtang P5,000 ang madawat sa mga job order nga mga empleyado.
Matud pa ni Mayor Nestor Archival nga kinahanglan pa iduso sa konseho ang sugyot sa kantidad sa bonus aron nga ipaubos og deliberasyon sa dili pa kini ipanghatag.
Bisan og wala pay tukmang petsa kung kanus-a kini mapanghatag, gipasalig ni Archival nga karong buwan kini madawat sa mga empleyado.
Ang kagamhanan adunay 1,543 ka mga regular samtang adunay 2,737 ka mga casual ug kapin sa usa ka libo ka mga job order nga mga empleyado nga makabenepisyo sa tinuig nga insentibo.
Gawas sa Christmas Bonus, gikumpirma ni Konsehal David “Dave” Tumulak nga ang matag empleyado makadawat usab og gift packs.
Gipasabot ni Tumulak nga niubos gyud ang bonus kun itandi niadtong miaging tuig nga anaa sa P25,000 tungod kini sa padayon nga relief operations human sa kadaot nga gibilin sa magnitude 6.9 nga linog ug Bagyong Tino. (BANAT NEWS)
- Latest
