Operation Damayan, TF foundation padayon
CEBU, Philippines — Nagpadayon ang pagtabang sa Operation Damayan, ang humanitarian initiative sa The Philippine Star uban sa The Freeman Foundation sa The Freeman ug Banat News sa mga pamilyang naapektuhan sa 6.9-magnitude nga linog nga miigo sa amihanang bahin sa Sugbo niadtong Septyembre 30.
Niadtong miaging semana unang nihatud og hinabang ang The Freeman Foundation sa San Remigio ug kagahapon, Oktubre 18, subling nagpahigayon og relief distribution sa Barangay Maharuhay, Medellin, ug Barangay Poblacion, Daanbantayan.
Gipangulohan ang kalihukan ni Philstar Media Group President ug CEO Miguel Belmonte, kauban si Mrs. Milette Belmonte, ug The Freeman General Manager Melandro Mendoza, uban sa mga volunteers sa Operation Damayan ug The Freeman Foundation.
Mitabang sab sa operasyon ang mga reservists sa Philippine Navy ug Philippine Marine Corps sa Medellin, ug mga ROTC ug COCC cadet officers gikan sa Cebu Technological University (CTU) Daanbantayan ug Cebu Roosevelt Memorial Colleges (CRMC) Bogo, uban sa ilang mga instruktor. Kapin sa 1,200 ka pamilya, 600 gikan sa Barangay Maharuhay ug 600 gikan sa Barangay Poblacion ang nahatagan og pagkaon, tubig, mga habol, ug uban pa.
Ang Operation Damayan maoy humanitarian arm sa The Philippine Star nga gitukod ni Betty Go-Belmonte kaniadtong 1980s aron motabang sa mga Pilipinong nagkinahanglan panahon sa mga kalamidad.
Matud ni Miguel Belmonte, ang Operation Damayan magpadayon tungod sa paningkamot sa mga volunteers ug mga miyembro sa media group.
Matud niya dili kini mahimong posible kung wala ang tabang ug kooperasyon tali sa The Freeman ug The Philippine Star volunteers and members.
“For me, the spirit of Operation Damayan in The Freeman Foundation is always with the team members, ahh.. our employees so.. volunteers, their time and their services. Through that help they make the project successful,” matud ni Belmonte. IBM BANAT NEWS
- Latest
