Gipuy-an sa upat ka Koreans gisulod

CEBU, Philippines — Nihimo na og imbestigasyon ang Cebu City Police Office(CCPO) mahitungod sa nahitabo sa upat ka mga Korean nationals nga giingong gisulod og mga armadong tawo ang ilahang gipuy-an sa usa ka village sa Barangay Talamban, siyudad sa Sugbo niadtong Oktubre 5, 2025, Domingo.

Ang mga biktima mao sila si Seo Heum In, 41; Oh Jong Min, 31; Yoon Seung Yong, 44; ug si Park Sung Min, 42; pulos taga South Korea ug temporaryong nagpuyo sa maong dapit.

Sa impormasyon sa Talamban Police Station 8 Cebu City Police pito ka mga lakake nga nagpailang mga police ang matod pa nisulod sa panimalay sa mga biktima.

Giingong mga armado ug nagbitbit matud pa og arrest warrant ang grupo sa mga kalalaken-an. Gikuha matud pa sa mga indibidwal ang IDs, yawe sa sakyanan ug gi-picturan matod pa sila sa mga suspetsado.

Giingong dunay say kwarta nga nakuha ug ang mga cellphone gibiyaan matod pa sa mga suspetsado sa ilahang pagbiya sa dapit.

Subay sa maong hitabo, si Police Captain Charisma Gonzales tigpamaba sa Cebu City Police Office miingon nakig-alayon na ang mga dapit nga dunay CCTV cameras aron makakuha og kopya ug mailhan ang mga suspetsado ug kun tinood ba nga mga police kini.

Ang City Intelligence Unit nitabang na sab sa mga biktima ingon man sa paghimo og imbestigasyon. IBM BANAT NEWS