National Elderly Week gisaulog sa siyudad sa Lapu-Lapu

Nakighiusa ang kagamhanan sa siyudad sa Lapu-Lapu sa pagsaulog sa National Senior Citizen Week 2025.

Gipahigayon ang kalihukan sulod sa City Auditorium sa Barangay Poblacion sa maong dakbayan diin mokabat sa 296 ka mga senior citizen nga gikan sa 30 ka mga barangay nga naglangkob sa 11 ka mga barangay sa Isla sa Olango ug 19 ka mga barangay sa mainland sa maong dakbayan ang nitambong.

Ang kasaulogan karong tuiga nagdala sa tema nga "Embrace Age: Living Life with Dignity and Purpose."

Atol sa kalihukan gipasidunggan ang mga katigulangan nga nakatampo sa kaayohan nga napahimuslan usab karon sa katawhan.

Sa iyang mensahe si Lapu-Lapu City mayor Cindi King-Chan mipadayag sa legasiya sa mga senior citizen sa siyudad nga dako kaayo kini og natampo sa mga kalamboan nga napahimuslan na karon sa mga nagsunod nga Oponganon.

Nunot niini gipasalig ni mayor Chan ang hugot nga pagsuporta ngadto sa mga senior citizen pinaagi sa paghatag og mga programa nga gitumong alang sa ilang kaayohan.

Dugang pa niya nga hugot usab ang iyang pagpakilambigit ngadto sa National Commission of Senior Citizen diin gumikan niini duha ka mga senior citizen nga octogenarians ang nakadawat sa ilang pinansiyal nga ayuda ubos sa Expanded Centenarians Act.

Samtang si Konsehal Annabeth Cuizon nga maoy chairperson sa Social Services, Senior Citizens ug PWD’s sa konseho sa maong dakbayan ang nagpalabang og resolusyon nga nag-awhag sa mga nagdumala og mga establisamento sa paghatag og kahigayonan sa mga senior citizen nga makasulod og trabaho bisan sa ilang pangidaron. (BANAT NEWS)