Gi-upgrade nga Cebu Coliseum giablihan pag-usab
CEBU, Philippines — Subling giablihan sugd kagahapong adlawa ang bag-ong gi-renovate nga Cebu Coliseum nga mas komportable, haruhay ug presko.
Matud pa ni University Of Cebu Chairman Augusto Go, dili lang pisikal nga pagpanindot ang gihimo nila sa Coliseum, gipalambo pa gyud nila kini ug mas bugnaw na kay bag-o na ang tanang air-conditioning system niini.
Nitambong ug mihatag og jersey nga dunay No. 1 si kanhi UC Webmaster ug PBA legend ug bise mayor Donaldo Hontiveros.
Aron dili na alimuot parehas kaniadto, nigamit na og heat-resistant plastic panels sa kisame sa tibuok building samtang ang salog sa korte gigamitan og Canadian Maple wood nga pasado sa FIBA standards ug sa NBA.
Ang coliseum gi-upgrade para maka-akomodar og 5,000 ka tawo para sa basketball games ug 8,000 para sa mga cultural events. Gibutangan na sab kini og four-sided scoreboard ug LED jumbotron, nga pinakauna sa coliseum nga pang world-class standards sama sa makita sa mga dagkong arenas sa Luzon.
Wala sab mabalaka si Go kabahin anang gitukod nga mas dakong coliseum sa South Road Properties tungod kay matud pa niya dili sila makigkompetensiya.
“We are not going to compete with them. We cannot compete with them. But if you want to have a smaller audience, then this is the venue,” matud pa ni Go.
Gawas sa basketball, mahimong anha sab ipahigayon ang ubang sporting events sama sa gymnastics, boxing, ug bisan ang mga civic gatherings.
Sunod tukoron duol sa coliseum ang upat ka andanang parking area. (BANAT NEWS)
- Latest
