Graduates sa CIT-U ning top sa Electrical Engineering Exam

CEBU, Philippines — Sa tinguha nga mahimong topnotcher, tulo ka graduates sa Cebu Institute of Technology-University (CIT-U) ang mipili nga ipahulay una ang gaming, laag ug uban pang kalingawan aron mas makapokus sa ilang pagpangandam sa Septiyembre 2026 Registered Electrical Engineers Licensure Examination.

Nabawi ang ilang mga sakripisyo human nakakuha pag-usab ang CIT-U og national No. 1 sa electrical engineering licensure examination, nga nahimong ikatulong sunod-sunod nga eksaminasyon diin ang unibersidad nakapagawas og first placer sa nasud. Nagtabla sa unang pwesto si Charles Anthony S. Santillan ug Dan Joel Monte de Leon sa Palompon Institute of Technology-Palompon, human silang duha nakakuha og 94.25 porsyento nga rating. Si Santillan usa usab ka summa cum laude graduate sa CIT-U. Duha pa ka graduates sa CIT-U ang nakasulod sa national Top 10. Si Kienth Vincent E. Oracion nakakuha sa ikatulong pwesto nga adunay 93.55 porsyento, samtang si Niño Louie P. Verame anaa sa ikaunom nga pwesto nga adunay 93.05 porsyento.

Atol sa press conference sa CIT-U Wall of Fame Library niadtong kagahapon, Septiyembre 16, gipaambit sa tulo ang ilang mga kasinatian, lakip ang mga sakripisyo ug mga hagit nga ilang giatubang samtang nangandam sa board examination.

Alang kang Santillan, dako nga bahin sa iyang pagpangandam ang pagminus sa oras sa gaming ug pagbalibad sa pipila ka laag uban sa pamilya ug mga higala. Miingon siya nga ang pressure kasagaran gikan mismo kaniya, ilabina human siya gideklarar nga CIT-U's King of Engineers.

Apan imbis nga pasagdan ang pressure nga mahimong babag, gigamit kini ni Santillan isip dugang nga motibasyon. Siya usab naghimo og aplikasyon nga iyang gigamit isip tabang sa pagtuon ug kaniadto nang mirepresentar sa eskwelahan sa regional ug national quiz competitions.

Gipadayag ni Santillan nga importante alang sa mga umaabot nga examinee ang paghimo og klarong plano, pagtakda og milestones ug pagsulat sa ilang mga tumong. Usa sa iyang gisulat sa whiteboard mao ang iyang pangandoy nga mahimong No. 1 electrical engineering examinee sa nasud.

Sama kang Santillan, gisakripisyo usab ni Oracion ang iyang gaming time ug temporaryong gideactivate ang iyang social media accounts aron malikayan ang mga makabalda sa iyang review.

Giawhag ni Oracion ang mga umaabot nga examinee nga mangita og hustong grupo o mga tawo nga makatabang kanila atol sa review. “Pangita og group o circles nimo. Helpful kaayo na mag-share mo sa knowledge,” matud niya.

Lahi usab ang giagian ni Verame, nga samtang nangandam sa board exam nagtrabaho isip photographer sa municipal public information office sa Minglanilla ug nag-atiman sa mga kabalaka sa ilang pamilya.  Ang iyang inahan nagpa-dialysis samtang ang iyang amahan nagkasakit og pneumonia, hinungdan nga wala siya makakuha sa April 2026 licensure examination ug naputol ang iyang review. Bisan pa niini, mipadayon si Verame sa pagpangandam alang sa September examination, nga iyang gihimo tungod sa iyang pamilya.

Matud niya, gusto niyang makatabang sa paghatag og mas maayong kaugmaon sa iyang mga ginikanan human makita ang ilang mga sakripisyo.

Nagplano usab siya nga ipadayon ang pagserbisyo sa publiko ug posible nga mobalik sa lokal nga gobyerno sa Minglanilla isip licensed electrical engineer.

Matud ni CIT-U College of Engineering and Architecture Dean Dr. Evangeline C. Evangelista, usa sa mga programa sa unibersidad ang sayong pag-ila ug pagpalambo sa mga estudyanteng adunay potensyal nga mahimong topnotchers.

Lakip sa suporta ang Saturday sessions, peer mentoring ug Learning Enhancement Program. Sa September examination, 44 sa 84 ka CIT-U electrical engineering examinees ang nakapasar, samtang 87 porsyento sa ilang first-time takers ang nakalusot.

Sa tibuok nasud, 1,676 sa 3,399 examinees ang nakapasar sa eksaminasyon nga gipahigayon sa 17 ka testing centers.