Rubber sa track oval sa CCSC nangagusbat na
CEBU, Philippines — Nangagusbat na usab ang rubberized track oval sa Cebu City Sports Center diin walo ka lane ang apektado sukad sa ulahing pag-ayo niini niadtong Nobiyembre 2024.
Si Brando Velasquez, executive director sa CCSC nipahigayon og inspection kagahapon sa track oval nakanayon nga peligoroso na kini ilabi na kadtong mga kusog nga managan nga anaa magbansay-bansay sa maong pasilidad gumikan kay adunay parte niini ang nangapahak, libaong, adunay mga niburot, ug aspalto na ang nisaka diin kuyaw kong dili kini makit-an ilabi na sa mga bata ug mga atleta.
Gihulagway ni Velasquez nga “poor materials” o “substandard”, nipis ug dili lig-on ang materiyales nga gigamit sa pag-ayo sa rubberized track oval itandi sa orihinal nga rubber nga gibutang niadtong 1994.
Si Velasquez konektado sa CCSC sukad pa niadtong 1994 ug gipakita niya ngadto sa mga tigbalita ang kalahian sa materiyales nga gigamit kaniadto diin baga ug lig-on nga napahimuslan sa hapit duha ka dekada sa wala pa kini gipaubos og rehabilitasyon ubos sa SBD Builders niadtong 2023 alang sa pagpahigayon sa Palarong Pambansa niadtong Hulyo 2024 nga gigastohan sa kagamhanan og P52 milyones.
Sa pagkakaron, magbutang ang mga nagdumala sa CCSC og mga pahibalo palibot sa mga apektadong lugar aron maalerto ang publiko samtang gikonsidera pa ang dugang evaluation ug posibleng pag-ayo sa track oval.
Gubutyag ni Velesquez nga gipahibalo na nila si Mayor Nestor Archival, Sr. kabahin sa kahimtang sa track oval aron maaksiyonan kini sa dili pa ipahigayon ang Sinulog 2026. BDB BANAT NEWS
- Latest
