Lotto outlet namaligya’s shabu

CEBU, Philippines — Nadakpan ang usa ka lotto operator outlet nga babaye sa Barangay Paknaan sa Siyudad sa Mandaue nga napanid-an sa kapolisan ug Philippine Drug Enforcement Agency (PDEA) 7 nga nalambigit usab sa illegal nga pagpamaligya og shabu.

Nasakmit gikan sa maong dinakpan ang 0.20 gramo nga shabu nga nagkantidad og P1, 360.00 apil na usab niini ang buy bust money.

Natigayon  ang maong buy bust operation human dunay nakahatag og impormasyon sa mga otoridad nga gawas sa sari-sari store ug sa iyang lotto outlet sa tupad niini, namaligya sab kini og shabu.

Ang mga tigpalitan og drugas magpakaaron-ingnon nga mopatad sa lotto apan drugas diay iyang gibaligya. 

Si Police Lieutenant Colonel Mercy Villaro, tigpamaba sa MCPO miingon nga sukad sa Enero 1 niining tuiga hangtod sa Agosto 10, 2025 dul-an sa P200 milyones nga kantidad nga shabu na ang ilang nasakmit nga moabot na og 28,815.15 gramo nga shabu  og 1,044 ka drug suspek ang nadakpan. Sa laing bahin, nadakpan sa mga operatiba ba City Drug Enforc ement Unit sa Dumaguete City Police Station Negros Oriental Police Provincial Office ang usa ka high value individual atol sa ilahang buy-bust operation sa Purok Kalubihan, Barangay Bajumpandan, Dumaguete City niadtong Huwebes sa gabii, Agosto 14, 2025.

Ang nadakpan mao si alyas Frank, 41 anyos, nagpuyo sa Barangay Buntis, Lungsod sa Bacong, Negros Oriental.  Nasakmitan ang suspetsado og 1,500 grams sa gituohang shabu nga nibalor og P10.2 million.  Ang maong operasyon subay kini sa impormasyon nga nadawat sa otoridad labot sa illegal nga kalihukan sa suspetsado. IBM BANAT NEWS