Polis nanghulga gidisarmahan

CEBU, Philippines —  Usa ka polis ang gireklamo sa usa ka American citizen kay giingong gihulga siya ug ang iyahang asawa nga nagbitbit sa ilahang lima ka buwan pa nga anak diha sa public market sa Barangay Poblacion, Lungsod sa Guindulman, Probinsya sa Bohol niadtong Lunes sa hapon, Agosto 11, 2025.

Una niini, ang langyaw nga si Kenny Foster, 41, nagpuyo sa Barangay Guinacot sa maong lungsod nag-post sa Facebook account niini mahitungod kasinatian niini sa maong polis.

Sa post ni Foster kini misaysay sa gihimo sa maong polis nga nag-duty matud pa sa merkado atong higayona ug nasuta matud pa nila nga kini hubog.

Ang maong polis atong higayona namara sa mga nagmotorsiklo nga wala magsul-ob og helmet ug apil siya sa mga gipara.

Apan giingong gitukmod matud pa siya sa polis ngadto sa iyahang motor ug mibunot matud pa kini sa iyahang armas.

Gawas niini, gisultihan sab matod pa siya og mga bati nga pulong ug giingong gihulga nga patyon kun mosukol.

Apil sab sa matud pa gihulga sa polis ang asawa niini nga nagkarga sa ilahang anak. Gisumbag sab siya niini diha sa iyahang kilid.

"I didn’t care as much as when he started screaming in the face of my wife and threatening her that’s what really pissed me off. You can mess with me. Just don’t mess with my wife or my kids," tipik sa  Facebook post ni Foster.

Nasayran nga ang langyaw nanawag sa 911 emergency hotline ug niresponde dayon sila si Police Master Sergeant Rodelio Zamora, Duty Investigator-On-Case ug si Police Staff Sergeant Sherwin Jose Salada apan sa ilahang pag-abot wala na didto ang gireklamong polis.

Apan niduol sa ilaha ang biktima ug mitaho sa nahitabo.

Gumikan sa reklamo nga gisang-at sa reklamante ngadto Guindulman Municipal Police Station pinangulohan sa ilahang hepe nga si Police Captain Exelsis Belcina ang iyang reklamo.

Giandam na ang affidavits ug ebidensya alang sa pagpasaka og kasong grave threats batok sa polis.

Samtang si BPPO Provincial Director Police Colonel Arnel Banzon mimando sa pagpahigayon og pormal nga imbestigasyon alang sa pagpasaka og kasong administratiba.

Mipagawas sab og kamanduan si Banzon nga ibalhin dayun sa Provincial Personnel Holding and Accounting Section (PPHAS), PARMU, Camp Francisco Dagohoy, Tagbilaran City ang maong polis sugod kagahapong adlawa, Agosto 12, 2025.

Gidisarmahan na sa iyang mga armas ang maong polis.

Nasayran nga dili kini ang unang higayon nga gireklamo ang maong polis tungod kay niadtong 2020 gireklamo sab kini kay magmaoy unya magpabuto sa armas.(BANAT NEWS)